Fräie Mikro Covid-19 : Eng Kris mat Risiken a Chancen

Mir liewen den Ament eng komesch Zäit. Engersäits gëtt alles gemaach, fir eis virum Coronavirus ze schützen, mee anerersäits bleiwen dobäi sozial a mënschlech Besoinen op der Streck, woubäi verschidde Bevëlkerungsgruppe méi betraff si wéi anerer. Austausch, Solidaritéit, Empathie, Vertrauen. Eis ganz Opmierksamkeet ass gefuerdert, nei Approchen an aner Moyene gi gebraucht fir déi gesellschaftlech Erausfuerderunge vu muer zesummen ze meeschteren, mengt d'Laura Zuccoli, Presidentin vun der Auslännerorganisatioun ASTI.

Laura Zuccholi / cbi

Meenung Laura Zuccoli
Foto: Archiv

Wa mer vun Affer vun den Isolatiounsmesurë schwätzen, denke mer virun allem u Kanner oder un eeler Leit an Altersheemer. Mee wéi erliewen eis Jugendlech dës Stresssituatioun? Sie stinn an engem Moment vun hirem Liewe, wou si sech vun doheem lass léise wëllen, wou d'Frëndschaft mat Alterskolleegen extrem wichteg ass, déi éischt Erfarungen an der Léift d'Gemidder beweegen a wichteg Entscheedunge fir d'Zukunft geholl musse ginn.

Schued vermeiden

Mir ginn eis vill Méi, all Zorte vun hygienesche Mesuren am Schoulmilieu ze huelen. Mee wéi ass et mat der Fräizäit vun dëse Jugendlechen? Se dierfe kee Sport an de Veräiner maachen, spillen dofir mat hire Frënn op iergendwellechen Terrainen oder treffe sech dobaussen mat villen Gläichalteregen. Anerer zécken eraus ze goen, well den Drock, sech ze schützen, ze vill grouss ass a verfalen dobäi an eng Lethargie virum Computer.

A wéi ass et mat de Jugendhaiser oder de Club des Jeunes ? Et ass elo wichteg, datt professionellt Personal aus dem Jugendberäich zur Verfügung steet, fir op d'Ängschten an d'Froe vun de Jugendlechen ze reagéieren. Mee dofir muss de vertrauensvolle Kontakt oprecht erhale bleiwen. Et gëllt, bleiwende Schued ze vermeiden andeems och d'Jugendhaiser am Respekt vun allen dréngende sanitäre Reegelen esou schnell ewéi méiglech erëm hir Dieren opmaache kënnen.

De soziale Kontakt

Mee dës Kris bitt och hier Chancen. Déi nei Informatiounstechnologien an d'sozial Medien hunn eist Liewen an de leschte Woche bestëmmt. Wann et eis scho viru Covid-19 dacks méi einfach war, mat Friemen op de soziale Netzwierker ze kommunizéiere wéi mat eisen Noperen, sou huet dës Kris dat nach verschäerft. Wéi wichteg déi géigesäiteg Ënnerstëtzung an de Kontakt zu deenen aneren ass, ass villen eréischt wärend dem Confinement bewosst ginn.

E wierklechen Hoffnungsschimmer sinn all déi Solidaritéitsaktiounen, déi riets a lénks entstane sinn. Vill Mënsche waren hëllefsbereet an disponibel, fir een deen aneren ze ënnerstëtzen. Esou wäertvoll Solidaritéitsbeweegunge musse genotzt an ausgebaut gi fir Mësstrauen ofzebauen an Brécken tëscht Mënsche ze schloen.

Den Austausch an der Noperschaft

Et schéngt mer, wéi wann elo de richtege Moment wier och zu Lëtzebuerg eng NoperschaftsApp anzeféieren, en Instrument, wat et an all eise Nopeschlänner scho gëtt a wat et erlaabt, Kontakter am direkten Ëmkrees op enger digitaler Plattform ze initiéieren, an do gemeinsam Aktivitéiten oder den Austausch vu Servicer a Saachen ze plangen.

Am Géigesaz zu Facebook fannen dës Aktivitéiten herno an der Realitéit statt, ënner Noperen aus engem Quartier, enger Strooss oder engem ganzen Duerf. Niewent dem soziale Notze vun esou enger Plattform, ka se e positiven Afloss op eng méi nohalteg Liewensaart hunn.

Benevolat valoriséieren

De Coronavirus huet eis gewisen, datt mer alleguer der selwechter Schicksalsgemeinschaft ugehéieren an datt de Benevolat en enorm wichtege Pilier vun eiser Gesellschaft ass. Fir de Mënschen d'Méiglechkeet ze bidden, sech an Zukunft méi op gesellschaftlechem Niveau anzebréngen, wier et sënnvoll a néideg, de benevollen Engagement ze valoriséieren!

Firwat net e Stonnekredit aféieren, deen ee fir seng Pensiounskarrière ugerechent oder als Reduzéierung vun der Wochenaarbechtszäit unerkannt kritt? Sou kéinte mer eng sëllege Benevollen laangfristeg fir hire gesellschaftlechen Asaz begeeschteren a belounen an esou Zesummeliewen fërderen.


Mam Zil fir déi ëffentlech Debatt ze fërderen, invitéiert de radio 100,7 am Fräie Mikro Leit aus der Zivilgesellschaft fir aktuell Themen ze kommentéieren. De Fräie Mikro ass e Gaaschtbäitrag mat Richtlinnen, am Respekt vun eisem Cahier des Charges, ënnert der finaler Responsabilitéit vum radio 100,7.

An der Mediathéik:

Fräie Mikro / / radio 100,7 Laura Zuccoli
Lauschteren

Méi zum Thema

Jean-Jacques Rommes Meenung
Fräie Mikro

Am Abléck, wou mir ënner dem Corona-Schock stinn, denke mer, mer sollten an Zukunft fir méi Resilienz suergen. Mee datt mer eis fir d'Zukunft rüste géingen, ass net ganz realistesch, fäert de Jean-Jacques Rommes.

Barbara Gorges-Wagner
Kanner - a Jugendtelefon

De Kanner- a Jugendtelefon gouf d'lescht Joer 782 mol ugeruff. Meeschtens goung et ëm d'Theema psychesch Gesondheet. D'Kanner schwätzen iwwer Angscht, Stress, Drock. An och an der Corona-Kris huet de Service en oppent Ouer.

Programm

  • Notturno

  • On air

    Vu 6 bis 10

  • Vun 10 bis 2

  • Vun 10 bis 2

  • Resonanzen

Net verpassen

Dossieren

  • CinEast-Festival 2020

    De CinEast-Festival weist eng Selektioun vu mëttel- an osteuropäesche Filmer. Déi 13. Editioun ass wéinst der Covid-Pandemie eng hybrid: d'Filmer gi souwuel um groussen Ecran wéi och online gewisen.

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen