D'CSV fuerdert nieft der Aféierung vun engem generelle Platzverweis, datt Organisateure fir méiglech Ausschreidungen haftbar gemaach kënne ginn. Weider wëllt déi gréisst Oppositiounspartei, datt d'Méiglechkeet, eng illegal Manifestatioun opléisen ze kënnen, gesetzlech verankert gëtt.
Substantiell Geldstrofe kéinten dissuasiv wierken, esou de Laurent Mosar virun der Press. An Nopeschlänner wéi a Frankräich géifen et Amende vu 7.500 Euro ginn - zu Lëtzebuerg léich d'Strof bei maximal 250 Euro. "Ech menge schonn, datt bei sou Zommen een et sech vläicht méi iwwerleet, wéi wann ee weess, datt ee just 250 Euro bezillt."
CSV fuerdert ee Fong fir Pertë vu Geschäftsleit ze kompenséieren
Et hätt een an de leschte Woche ganz schwéier Zäiten an der Stad gehat, déi ee groussen Impakt op d'Zesummeliewe gehat hätten, esou iwwerdeems den éischte Stater Schäffe Serge Wilmes. Vill Leit géifen net méi gären an d'Stad kommen a ganz besonnesch déi Stater Geschäftswelt géif dorënner leiden.
Duerch d'Corona-Restriktiounen an eng Partie Chantieren hätten d'Stater Geschäftsleit scho schwiereg Zäite materlieft. Hei géifen elo d'Demonstratioune vun de leschte Wochen nach derbäi kommen.
D'CSV fuerdert dofir, datt de Staat ee Fong uleet fir de Geschäftsleit d'Perten ze entschiedegen, déi duerch dës Manifestatiounen entstane sinn, "well eben de Staat zivil och haftbar ass bei esou Schied, déi bei Manifestatiounen entstinn", esou de Serge Wilmes.