Fräie Mikro D'Angscht virun der Migratioun

Europa deet sech schwéier mat der Flüchtlingsfro: Si suergt international fir Opreegung, gëtt fir innepolitesch Zwecker mëssbraucht a si polariséiert d'Gesellschaft. "Wéi laang musse mir deem Zirkus nach nokucken", freet de Laurent Moyse.

Laurent Moyse / cz

Meenung Laurent Moyse
Laurent Moyse

Viru genee 80 Joer, vum 6. bis de 15. Juli 1938, hu sech 32 Delegéiert zu Evian zesummefonnt, fir iwwer d'Flüchtlingskris ze schwätzen, déi deemools an Europa ëmmer méi akut ginn ass. Mat Ausnam vun der Dominikanescher Republik hunn d'Länner dunn decidéiert, datt hir Grenzen dicht bleiwen an nëmmen eng begrenzten Zuel vu Flüchtlingen opgeholl ginn. D'Resultat kenne mir: Mat deem Beschloss kruten d'Diktature vun deemools en Zeechen, datt si ouni grousse Widderstand hir rassistesch an antisemitesch Ënnerdréckungspolitik konnte weiderdreiwen.

EU schléisst Accorde mat zweiwelhafte Staaten

Et soll een ëmmer virsiichteg bleiwen, wann een déi haiteg Situatioun mat där vun deemools vergläiche wëllt. Et soll een oppassen, datt een d'Saachen am richtege Kontext beliicht, datt een net alles duerchernee geheit a Froe vu Rechtsstaatlechkeet an Demokratie an d'richtegt Liicht réckelt. Et fält awer op, datt 80 Joer no Evian d'Flüchtlingsfro erëm politesch mëssbraucht a wirtschaftlech ausgenotzt gëtt. D'EU schléisst en Ofkommes mat Staaten, déi net nëmmen eng zweiwelhaft Reputatioun a punkto Mënscherechter hunn, mee och scho laang verstanen hunn, datt ee mat där Problematik Drock ausüben an eventuell och Suen dofir froe kann, wéi dat zum Beispill mat der Tierkei de Fall ass. Esou ähnlech sinn d'Bezéiunge mat de Maghreb-Staaten oder mat Libyen. De Khaddafi huet zu senger Glanzzäit ganz gutt verstanen, wéi een d'Flüchtlingsschleisen op an zou maache sollt, fir seng Politik duerchzezéien. Och d'Flüchtlingszuel aus Marokko a Richtung spuenesch Inselen ass zäitweis geklommen, zoufälleg dann, wann de Problem vun der westlecher Sahara erëm op d'Tapéit komm ass.

D'Zäit vun de Paradoxen

Dobäi kënnt, datt esou laang eng ganz Rei gescheitert Staaten, iwwer déi kaum nach ee schwätzt, weider am Chaos ënnerginn, de Mënschenhandel floréiert an d'Konflikter undauere wäerten. Mat Transitzenteren oder Opfanglagere kritt een de Problem net an de Grëff. Et ass e Paradox, dee grad am Moment, wou d'Zuel vun de Refugiéen, déi a Richtung Europa auswanderen insgesamt erofgeet, ëmmer méi Moossname getraff ginn, fir Maueren opzeriichten. Et ass e weidere Paradox, datt grad an enger Zäit, wou d'Mobilitéit ëmmer méi grouss gëtt an d'Sesshaftegkeet net méi dee Stellewäert huet wéi fréier, alles gemaach gëtt, fir d'Awanderung ze ënnerbannen. Amplaz d'Entwécklungshëllef vun de räiche Länner ze hannerfroen, amplaz d'Korruptioun vun den Machthaber an enger ganzer Rei vu Länner ze bekämpfen, gi grad déi, déi am mannsten dofir kënnen, drangsaléiert oder zeréckgewisen.

De Ruff nom staarke Leader gëtt ëmmer méi haart

De Flüchtling mécht Angscht. Hie verkierpert de Frieme par excellence, deen deen anescht ass an eis de Spigel virun d'Aen hält. De Ruff nom staarke Mann, wéi mir dat ëmmer méi an Europa observéieren, huet jo net als Zil, de Flüchtlingsproblem ze léisen, mee eis vun enger Realitéit ofzeschiermen, mat där mir näischt méi ufänke kënnen a wou et u politesche Léisunge feelt. Domat gi mir deenen d'Verantwortung, déi d'Mënschheet a Kategorien opdeelen an domat d'Intoleranz propagéieren.


Mam Zil, déi ëffentlech Debatt ze fërderen, invitéiert de radio 100,7 am Fräie Mikro Leit aus der Zivilgesellschaft fir aktuell Themen ze kommentéieren. De Fräie Mikro spigelt reng d'Meenung vu sengem Auteur erëm.

An der Mediathéik:

Fräie Mikro / / Laurent Moyse
Lauschteren

Méi zum Thema

Thierry Simonelli Meenung
Fräie Mikro

D'Lëtzebuerger Ekonomie diversifizéiert sech net nëmme mat Militärsatellitten, mee investéiert elo och an Dronen. "Ka Lëtzebuerg gläichzäiteg politesch a moralesch integer bleiwen", freet den Thierry Simonelli.

Laura Zuccoli Meenung
Fräie Mikro

Gëschter war den internationale Flüchtlingsdag. Eng Geleeënheet fir op déi katastrophal Zoustänn vun der Flüchtlingspolitik net nëmmen an Europa, mee weltwäit opmierksam ze maachen, mengt d'Laura Zuccoli.

Jean-Paul Lehners Meenung
Fräie Mikro

Weist déi ablécklech Kris a villen europäesche Länner drop hin, datt et kee Konsens iwwer d'Fro vu gemeinsame Wäerter gëtt, obschonn europäesch Texter dat virgesinn? Gedanke vum Jean-Paul Lehners.

Veronique Bruck Meenung
Fräie Mikro

Gëtt et eng méiglech Wiesselwierkung tëscht enger ëmmer méi repressiver Legislatioun an dem Gewaltpotential säitens de Policebeamten? E Fräie Mikro vun der Juristin Véronique Bruck.

Programm

Dossieren

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Dateschutz

    De 25. Mee trëtt an der EU en neit Dateschutzreglement a Kraaft. Wat bedeit dat fir d'Bierger an d'Betriber? A wat ännert wierklech? Detailer an eisem Themeschwéierpunkt.

Communiquéen

  • radio 100,7: Changement à la tête de la rédaction musicale

    M. Yves Stephany a été nommé à la tête de la rédaction musicale de la radio de service public radio 100,7. M. Stephany, 37 ans, y prend la relève de M. Fred Medernach qui a fait valoir ses droits à la retraite.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen