Eigentlech hätt déi aktuell Koalitioun nach vill ze schaffen, mee si géif dat net méi fäerdeg bréngen, sou de Claude Wiseler a senger Ried.
"Dofir ass et ganz kloer an däitlech: Et ass Zäit fir e Wiessel, a mir si prett fir dee Wiessel."
Besonnesch an der Kritik stoungen d'Logements, d'Gesondheets an d'Landwirtschaftspolitik. Et bräicht ee keng juristesch Experimenter mam Legaliséiere vu Marihuana, gefrot wier genuch Personal am Spidolssecteur. Et wier donieft verpasst gi mat enger Steierreform d'Leit z'entlaaschten, sou wéi d'CSV dat virgeschloen hätt, sou de Gilles Roth.
Et wier fir d'CSV net nozevollzéien, datt et aktuell zu Lëtzebuerg den héchsten Aarmutsrisiko géif ginn, ee Véierel vun de Leit géif aktuell ënner dem Aarmutsrisiko liewen a 40 Pro"zent vun den Elengerzéiher géifen och ënnert der Aarmutsgrenz liewen. "A wat mécht d'Regierung? Eigentlech näischt."
Kritik u Koalitiouns-interne Streidereien
Eng Virlag hunn d'Koalitiounsparteie mat hiren interne Kriticke geliwwer, viséiert war hei den LSAP Deputéierten Dan Kersch.
"Wann een néng Joer an der Regierung war, dervunner eng ganz Rei Jore Vize-Premier, an da wiesselt een an d'Chamber fir lauthals dat ze froe wat ee säit néng Joer net gemaach huet, da muss ech soen ass dat awer eng besonnesch Attitüd an dëser Regierung."
D'CSV wëllt de Buergermeeschterposten an der Stat an de politesche Wiessel um nationale Plang. D'Partei wier allefalls prett Responsabilitéit z'iwwerhuelen, et wier ee gutt verankert a breet opgestallt, wéi et sech fir eng Vollekspartei géif gehéieren.