Net onbedéngt d'Nominatiounen u sech, mee d'Aart a Weis wéi se geholl gi sinn. D'Haaptschold gëtt d'Viviane Reding dem franséische President Macron. Dee géif grouss europäesch Rieden halen a just de Contraire maachen. D'Wieler wieren op jiddwer Fall ugeschmiert ginn.
"Vertrauen an d'EU beschiedegt"
"''t ass e bëssen Uschass, (...) A wat mech besonnesch schockéiert huet ass, datt eise Premier - dee jo d'Sproochrouer vum Här Macron ass - datt deen dann dat selwecht behaapt huet."
Dee Moment an deem de Macron de Spëtzekandidatesystem a Fro gestallt huet, hätt och de Xavier Bettel dee System a Fro gestallt. Duerch dat Verhale géif een d'Vertrauen, wat d'Leit an d'EU hu beschiedegen, sou d'Viviane Reding.
D'Viviane Reding wier gär mat an d'Europawahle gaangen
D'Viviane Reding geet awer dovun aus, datt d'Ursula von der Leyen a 14 Deeg vum Europaparlament confirméiert gëtt. Si mécht och keen Heel draus, datt si gär mat an d'Europawahle gaangen wier. Dat wier aus Siicht vun der CSV och "vernënfteg" gewiescht.
"Meng Partei war der Meenung, datt ee kee géif mat op d'Lëscht huelen, deen an der Chamber setzt. Dont acte. An d'Resultat hu Der jo gesinn."
De Parteipresident Fränk Engel hätt sech, mat der Decisioun just op nei Gesiichter ze setzen, verpokert.