Fräie Mikro D'Press ass ënner Drock

D'Lëtzebuerger Presselandschaft ass virun engem Mount ëm ee Pressetitel méi aarm ginn. Vill Froe stelle sech iwwer d'Zukunft vun eiser Medielandschaft, mee déi allerwéinegst bréngen et fäerdeg, ee kloert Bild vun deem uerg gerëselte Secteur ze molen. Iwwerleeungen dozou vum Laurent Moyse.

Laurent Moyse / cz

Laurent Moyse
Laurent Moyse

Ufank Juni huet de Grupp Editpress hir franséischsproocheg Wochenzeitung Le Jeudi ouni vill Gedeessems agestallt. D'Wirtschaftlechkeet vun der Zeitung war net méi tragbar, trotz der staatlecher Pressehëllef, déi dëst Organ - wéi verschidden anerer och - all Joer kasséiert huet. Mat enger Verkafszuel, déi pro Woch ënner 1.500 Exemplairen erofgerutscht ass, konnt Editpress, déi selwer finanziell staark geschwächt ass, dee Produit net méi iwwer Waasser halen.

An der Lëtzebuerger Medielandschaft ass dëst Nouvelle zimlech kal opgeholl ginn. Dat ass net erstaunlech, wann ee weess, datt d'Medienhaiser ganz vill mat sech selwer beschäftegt sinn, a si alleguer méi oder wéineger no wirtschaftleche Modeller sichen, déi an Zukunft d'Iwwerliewe vun hire Produite garantéiere kéinten. D'Kris an der Press ass zwar net nei, mee si huet sech mam digitale Wandel verschäerft. Zu Lëtzebuerg war ee bis elo éischter verwinnt: gemooss un der Gesamtpopulatioun war d'Zuel vun de Medientitelen ëmmer relativ héich, op jiddefalls am Verglach mam Ausland.

Vereinfachung amplaz Analys, Recherche a Reflexioun

D'Digitalisatioun ass awer nëmmen eng vun den Ursaachen déi maachen, datt d'Medielandschaft, a besonnesch d'Presselandschaft, staark ënner Drock geroden ass. D'Vilfältegkeet vun der Populatioun an doduerch vun de Sproochen, hunn de Maart esou staark fraktionéiert, datt keen Organ et méi fäerdeg bréngt, all déi verschidde Bestanddeeler vun eiser Gesellschaft ze erreechen. An den alldeegleche Pendel vun de Frontaliere mécht et net méi einfach, fir gläichzäiteg d'Interesse vun den Residenten a vun den Net-Residente mat pertinenten Informatiounen ze decken.

Een anere Volet ass de Gratiskonsum, deen d'Informatioun masseweis iwwer eis Schiermer liwwert, eng Low-Cost-Informatioun, déi un Iwwerflächlechkeet kaum ze iwwerbidden ass, awer de Virdeel huet, séier a flächendeckend un de Konsument ze kommen. Do gëtt manner d'Kompetenz vum Beruffsjournalist a Saachen Analys, Recherche a Reflexioun gefrot, wéi seng Fäegkeet, déi verschidde Plattforme gläichzäiteg mat kuerzen a bündegen Texter ze fidderen.

Eegeverantwortung kann net schueden

Iergendwéi leeft hei eppes falsch zesummen. Ëmmer méi gëtt op e vereinfachten Inhalt zougegraff, fir datt ee gewuer gëtt, wat an enger ëmmer méi komplexer Welt geschitt. Esou eng Entwécklung kann net gutt ausgoen. Mir spieren et elo schonn, wa mir gesinn, wéi weltwäit een Deel vun der Politik den Dréi fonnt huet, sech mat simplisteschen Iddien duerchzesetzen an net fäert, d'Leit heimat ze manipuléieren. Souguer d'Fakte ginn ëmmer méi dacks verdréit, woubäi net nëmme Politiker sech domat an d'Zeen setzen, mee och munchmol Journalisten, ONG-Vertrieder, Public-Relation-Manager oder aner wichteg Acteuren aus der Gesellschaft. Et ass traureg ze gesinn, datt esou vill Leit sech vun all deem dreiwe loossen a sech weder Zäit nach d'Energie huelen, fir sech fräi an onofhängeg eng Meenung ze bilden, éier si op déi sozial Netzwierker lassfueren an dacks kollateral Schied uriichten. E bësschen Eegeverantwortung kéint do op jiddwer Fall net schueden.


Mam Zil, déi ëffentlech Debatt ze fërderen, invitéiert de radio 100,7 am Fräie Mikro Leit aus der Zivilgesellschaft fir aktuell Themen ze kommentéieren. De Fräie Mikro spigelt reng d'Meenung vu sengem Auteur erëm.

An der Mediathéik:

Fräie Mikro / / Laurent Moyse
Lauschteren

Méi zum Thema

Jean-Lou Siweck
Medien

Dësen Donneschdeg kënnt déi lescht Editioun vu "Le Jeudi" eraus. D'Fro hätt zanter engem Joer ëmmer erëm am Raum gestanen, well d'Zeitung defizitär ass, esou de Generaldirekter vun Editpress.

D'Medielandschaft zu Lëtzebuerg Exklusiv
Pressehëllef

Maximal 1,6 Milliounen Euro u Pressehëllef kann ee Medium an Zukunft vum Staat accordéiert kréien, wa bestëmmte Konditiounen erfëllt sinn. D'Editeure fuerderen ee méi präzisen Text.

Verschidde Presseoranger Exklusiv
Verschidde Sockelen

An Zukunft soll d'Zuel vun de Journalisten de Kritär fir d'Héicht vun der Pressehëllef sinn. Dat gesäit den Avant-Projet de loi vir, deen dem radio 100,7 virläit. Et soll awer kee manner kréien.

Eng Journalistin schreift een Artikel
Medien

Déi nei Online-Pressehëllef ass a Kraaft. Et krut awer nach kee Medium se accordéiert. Et gi Schwieregkeete bei der Interpretatioun vun de Critèren. Fënnef Demandë ginn den Ament traitéiert.

Programm

  • Noriichten

  • On air

    Notturno

  • Virum Dag

  • Moies-Magazin

  • Iwwer Mëtteg

Net verpassen

  • Dëse Sonndeg um 11:00 LIVE aus der Congresshalle zu Saarbrécken

    DRP

    Eng Symphonie mat Piano - Esou gëtt dacks dem Johannes Brahms säin zweete Pianosconcerto beschriwwen. De russesche Pianist Nicolai Lugansky spillt dëst Wierk an där nächster Matinée vun der Deutschen Radio Philharmonie Saarbrücken Kaiserslautern, déi de radio 100,7 zesummen mat SR2 KulturRadio e Sonndeg, 15. Dezember 2019, vun 11.00 Auer u live aus der Congresshalle zu Saarbrécken iwwerdréit.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen