D'Regierung bleift dobäi, fir déi aktuell Restriktiounen en place ze loossen ouni nei gesetzlech Mesuren: "Wann d'Stroosse glat sinn, gi se och net direkt gespaart", esou d'Paulette Lenert de Mëtteg virun der Press. Si huet nach eng Kéier un d'Bierger appelléiert d'Mesuren ze respektéieren. Jiddweree misst elo Zousazefforte maachen, esou d'Gesondheetsministerin.
De Virus wier do, also sollt een doheem bleiwen, wann et nëmme méiglech ass. Et wier wichteg, d'Kontakter ze iwwerdenken a sech am klenge Krees ze beweegen. Et sollt verstäerkt op Teletravail zeréckgegraff ginn.
D'Gesondheetsministerin huet d'Bierger och nach eng Kéier opgeruff, déi eege Kontakter all Dag opzeschreiwen, fir am Fall vun engem positiven Test den Tracing ze verbesseren.
"Alarmant, mee ënner Kontroll"
Trotz méi Neiinfektioune wier d'Altersmoyenne vun de Leit, déi positiv getest goufen, just liicht eropgaangen. Déi viregt Woch wier se bei 36,8 Joer gewiescht, d'lescht Woch war se bei 38,8 Joer. Et géif ee weiderhin déi eeler Populatioun am A behalen.
Et wieren "nach net" vill Patienten op den Intensivstatiounen: Momentan si sechs Leit an de Soins intensifs.