Affär Traversini De Roberto Traversini trëtt als Deputéierten zeréck

De Roberto Traversini huet als Deputéierten demissionéiert. Dat huet hien haut per offene Bréif matgedeelt. De Roberto Traversini zitt domat d'Konsequenzen aus den Evenementer vun deene leschte Wochen a Méint.

Michèle Sinner / cbi

Roberto Traversini
De Roberto Traversini ass den 20. September als Buergermeeschter vun Déifferdeng zeréckgetrueden. Foto: Archiv

Am oppene Bréif schreift de Roberto Traversini, hien hätt an de leschten Deeg a Woche Geleeënheet gehat, "fir iwwer déi Saachen nozedenken", déi an der Ëffentlechkeet diskutéiert goufen. Dat, wat hie gemaach hätt, kéint hien net méi réckgängeg maachen, mee hie wéilt sech dofir entschëllegen a "probéieren,, mat Optimismus an Energie an d'Zukunft ze kucken".

An de leschten Wochen a Méint war bekannt ginn, datt am neie PAG vun der Gemeng Déifferdeng seng Parzell an der Klenggäertner-Zon sollt an de Bauperimeter opgeholl ginn. D'Noopeschparzelle sollen awer net ëmklasséiert ginn.

Aarbechten um Gaardenhaischen ouni Geneemegung

D'Oppositioun am Déifferdenger Gemengerot hat ausserdeem opgedeckt, datt hien ouni déi noutwenneg Baugeneemegunge vum Ëmweltministère an der Gemeng Aarbechten um Haus op der Parzell maache geloossen hat, esou wéi um Gaardenhaus op der Nopeschparzell.

Dëst Gaardenhaische befënnt sech an der Naturschutzzon Natura 2000 an an der Reserve naturelle Prënzebierg. Déi Aarbechten hat hie vun der lokaler Beschäftegungsinitiativ CIGL maache gelooss, déi deels als Formatioun ofgebucht an deels och ongerechtfertegt an ouni Facture gemaacht goufen.

Enquête géint Roberto Traversini leeft

D'Oppositioun hat him ausserdeem nogewisen, datt hie vun de Gemengeservicer eng Opmooss vun Haapthaus, wat him gehéiert, maache gelooss hat.

Géint de Roberto Traversini leeft eng Enquête vum Parquet wéinst Verontreiung vun ëffentleche Gelder, der Prise illegale d'intérêts a wéinst Verstéiss géint d'Gesetz iwwer den Aménagement du territoire. De Roberto Traversini hat dowéinst virun annerhallwer Woch als Buergermeeschter vun der Gemeng Déifferdeng demissionéiert. Hien ass och als President vum CIGL zeréckgetrueden.

Seng Parteikolleegin an Ëmweltministesch Carole Dieschbourg huet sech dës Woch op enger Pressekonferenz an an der Chamber-Ëmweltkommissioun géint d'Virwërf vun der Oppositioun verdeedegt, déi Autorisatioun, déi si dem Roberto Traversini nodréiglech fir d'Aarbechten um Gaardenhaus ausgestallt hat, wier illegal an hätt net dierfen ausgestallt ginn.

De Roberto Traversini war zanter de Chamberwahlen am Hierscht 2013 Deputéiert fir déi gréng.

Méi zum Thema

De Roberto Traversini beim Gaardenhäisschen
Immobiliëskandal

De Parquet enquêtéiert géint de Roberto Traversini a géint Onbekannt, ënner anerem wéinst "Detournement de deniers publics". De Roberto Traversini hat de de Freideg de Moie seng Demissioun als Déifferdenger Buergermeeschter a Gemengerot ginn.

Roberto Traversini
Affär Traversini

De Roberto Traversini trëtt als Buergermeeschter vun Déifferdeng zeréck. Hien zitt domat Konsequenzen no den Uschëllegunge géint seng Persoun. Hien huet ë.a. zouginn, Gemengeservicer fir privat Zwecker mëssbraucht ze hunn.

Jean-Claude Franck Analys
Politesche Wocheréckbléck

D'Deeg vum Roberto Traversini als Déifferdenger Buergermeeschter schénge gezielt ze sinn. An de leschten Deeg huet hie vill Feeler missten agestoen. Fir 11 Auer huet hien eng Pressekonferenz aberuff.

Programm

  • Resonanzen

  • On air

    Spektrum

  • Ënnerwee

  • Time Out

  • Rockultur

Net verpassen

Dossieren

  • Affär Traversini/Dieschbourg

    De Roberto Traversini ass als Buergermeeschter an Deputéierten zeréckgetrueden. Hannergrond sinn Autorisatioune fir d'Aarbechten un engem Gaardenhaischen an d'Fro, ob hie bevirdeelegt ginn ass.

  • Kuriositéiten aus der Lëtzebuerger Sprooch

    Si oder hatt? Zwee oder zwou? Domat oder domadder? Lëtzebuergesch ass och fir Mammesproochler net ëmmer einfach. Mir ginn der Saach op de Fong.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen