International Bezéiungen Déi däitsch-franséisch Frëndschaft an d'Roll vu Lëtzebuerg

Den Emmanuel Macron reest direkt den éischten Dag no senger Inauguratioun op Berlin bei d'Angela Merkel. D'Medie schwätze vun enger neier, revitaliséierter Allianz tëscht Frankräich an Däitschland. Historesch ass d'Frëndschaft op alle Fall a Lëtzebuerg huet zäitweis och eng Roll dobäi gespillt.

Sarah Pepin / tsk

Macron Merkel
Den Emmanuel Macron an d'Angela Merkel bei hirem éischten Treffen (Foto: picture alliance / Simone Kuhlmey))

Déi däitsch-franséisch Frëndschaft gouf et net ëmmer an et ass eréischt no den zwee Weltkricher, datt déi zwee Länner beienee fonnt hunn. "Dobäi huet Lëtzebuerg eng net onbedeitend Roll gespillt," seet de Romain Leick, laangjärege Journalist vun der däitscher Zeitung Der Spiegel.

Schonn nom Éischte Weltkrich hätt Lëtzebuerg versicht, den Dialog tëscht Däitschland a Frankräich erëm a Gank ze bréngen. Dat wier och de Fall nom Zweete Weltkrich gewiescht. "De fréiere Lëtzebuerger Premierminister Joseph Bech war e gudde Bekannten a Gespréichspartner vum fréieren däitsche Kanzler Konrad Adenauer. Béid Männer hu sech och heiansdo zesummen iwwer Frankräich beklot. Lëtzebuerg huet déi Roll, déi et am beschten ausübe kann, wann et falsch Mustere vun der Perceptioun vun deem enge vis-a-vis vun deem anere Land interpretéiere kann." Dat wier déi eigentlech Roll vun engem, deen en Dialog soll stëften tëscht zwee Länner, déi sech laang als Konkurrenten oder Äerzfeinde betruecht hunn.

Ongewëss Zukunft fir d'Bezéiungen

Haut ka vu Feindschaft keng Rieds méi sinn, wann den Emmanuel Macron, nei gewielte franséische President, säin éischten Dag notzt, fir op Berlin bei d'Angela Merkel ze reesen. An um häerzlechem Empfang huet et net gefeelt. D'Leit stounge mat europäesche Fändele virum Kanzleramt, den Ausseminister Sigmar Gabriel huet hie souguer um Fluchhafen ofgeholl.

Mä d'Bezéiung Frankräich-Däitschland ass bis am September vun dësem Joer, wann d'Bundestagswahlen an Däitschland wäerte sinn, nach ongewëss. An Diskussiounen ass och ëmmer nees Rieds vun där albekannter Dynamik tëscht deenen zwee Länner. Däitschland, deem et wirtschaftlech gutt geet an dat op Frankräich e wéineg erofkuckt. Virun allem well d'Land reformresistent war a säi Chômage net an de Greff géif kréien. "Däitschland hat seng wirtschaftlech Iwwerleeënheet tatsächlech e bëssen ausgespillt. Mä och Däitschland steet net ëmmer esou brillant an alle Kategorien do, wéi ee vläicht mengt," seet de Romain Leick.

Zu enger Zäit, wéi d'Relatioun tëscht den zwee Länner ganz schwiereg war, nämlech an den 20er Joren, huet Lëtzebuerg eng Schlësselroll ageholl. Zu Kolpech, am klengen Duerf un der belscher Grenz, hunn d'Aline an den Emile Mayrisch am Schlass Kolpech eng Aart kontinental Bloomsbury Group opgemaach.

Interkulturellen Dialog an europäescht Verständnes

Aus kulturhistorescher Siicht bedeit Kolpech e wichtegen a wierklech moderne Moment, wéi wirtschaftlech Interessien an den intellektuellen Debat vun dräi Länner zesummekoumen. Den Zweete Weltkrich koum nach dotëscht, mä de Versuch vum interkulturellen Dialog a vum europäesche Verständnis war fir d'Zukunft geluecht. Haut lieft den Esprit vu Kolpech ënnert anerem an der Form vum IPW weider, dem Institut Pierre Werner, dee sech als trinationale Kulturinstitut versteet. Hautdesdaags ass Europa onverzichtbar, sou den Direkter vum IPW Olivier Frank.

Méi zum Thema

Michel Majerus. Laboratorium für die Feststellung des Offensichtlichen
Konscht

Viru 15 Joer ass de Kënschtler beim Luxair-Accident ëm d'Liewe komm. An der däitscher Haaptstad erënneren zwou Ausstellungen un de Lëtzebuerger. Se loossen déif blécken.

Zaldoten um Härebierg
Kampf géint den IS

Wann een EU-Memberstaat op sengem Territoire mat Waffen agresséiert gëtt, mussen déi aner Memberen hëllefen. Frankräich kritt deemno am Kampf géint den IS Ënnerstëtzung. Wat ass d'Roll vu Lëtzebuerg?

Programm

  • Notturno

  • On air

    Virum Dag

  • Noriichten

  • Moies-Magazin

  • Panorama

Dossieren

  • Franséisch Presidentiellen 2017

    De 7. Mee ass den zweeten Tour vun de Presidentschaftswahlen a Frankräich. De radio 100,7 bericht iwwer d'Kandidaten an d'Enjeuë vun dëse Wahlen.

  • Gemengewahlen 2017

    Den 8. Oktober kënnen d'Bierger aus de 105 Gemengen am Land hir lokal Vertrieder nei bestëmmen.

Communiquéen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen