Europawahlen 2019 "Déi Konservativ kenneléieren"

De Wahlprogramm fir d'Europawahle vun Déi Konservativ gëtt eréischt an den nächsten Deeg verëffentlecht. De Spëtzekandidat Joe Thein huet op de Programm vun Déi Konservativ fir d'Chamberwahlen zejoert verwisen: do stéingen och Detailer iwwer d'Europapolitik dran.

Carole Schimmer / cbi

Joe Thein
De Joe Thein, Spëtzekandidat vun Déi Konservativ, war virdru Member bei der ADR

An dësem Wahlprogramm ass ënner anerem d'Fuerderung fir de Schengenraum ze reforméieren an nees punktuell Grenzkontrollen anzeféieren. Weider misst an der Eurozon gekuckt ginn, datt d'Länner d'Krittäre vun der Staatsverschëldung respektéieren.

Griichenland soll aus der Eurozon

Verschidde Länner wiere mëttlerweil an eng "Scholdespiral" geroden. Griichenland hätt eng Staatsverscholdung, déi méi héich wéi 60 Prozent vum Bruttoinlandprodukt wier. "Italien ass net besser drun an aner Länner och", esou d'Analys vum Spëtzekandidat vun Déi Konservativ.

Ee Grond heivir wier, datt et an dëse Länner eng korrupt Politik géif ginn, "wou d'Grondlage vun der Europäescher Unioun net respektéiert ginn", esou de Joe Thein. An hirem europäesche Manifest fuerderen Déi Konservativ, datt Griichenland d'Eurozon virleefeg soll verloossen an d'Drachmen nees aféiere sollt. "Da muss gekuckt ginn, iwwer all déi Reformen, déi an deem Kontext vun de Finanzen ze maache sinn, a wéiwäit et méiglech ass fir Griicheland erëm nees zeréck an d'Eurozon ze kommen."

"Och dat ass de Wielerwëllen"

D'Zil vun Déi Konservativ ass et méi Stëmmen ze kréie wéi bei de Chamberwahlen. Landeswäit koumen Déi Konservativ am Oktober 2018 op 0,27 Prozent vun de Stëmmen. De Joe Thein erkläert d'Wahlresultat vun 2018, well d'Partei just mat enger Lëscht am Süden ugetruede war. "Dat sinn awer och ronn zéngdausend Stëmme gewiescht an dat ass och den Ausdrock vun engem Wielerwëllen", esou de Joe Thein.

D'Zil bei den Europawahle wier et fir "nach ee bessert Resultat ze maachen". Esou géif d'Partei och bestätegt kréien, datt si déi richteg Politik géif maachen. Bei dëse Wahle geet et dem Joe Thein dorëms, ee politesche Message ze schécken, datt "d'Leit eng Kéier d'Iddi vun de Konservative kenneléieren".

Ee Kandidat huet d'Partei ewell verlooss

Bei den Europawahlen trieden Déi Konservativ mat sechs Kandidaten a mam Slogan "D'éischt Lëtzebuerg, dann Europa" un. Ee vun de Kandidaten, de Mario May, huet mëttlerweil d'Partei verlooss. Hien huet iwwer d'sozial Netzer gesot, datt d'Leit hie net solle wielen.

Dozou sot de Joe Thein, Spëtzekandidat vun Déi Konservativ fir d'Europawahlen, datt Déi Konservativ sech mat engem Averständnis mam Mario May getrennt hätten, "well mir der Meenung sinn, datt et do näischt méi gëtt fir ze streiden." Reesender sollt een net ophalen, fënnt de Joe Thein. Et wier dem Mario May säi gutt Recht d'Partei ze verloossen.

"An och wann hie Vizepresident ass, mir sinn all als Politiker ersetzbar. Do muss den Här May mat sengem Gewësse vereinbaren, ob dat dee richtege Schratt vis-à-vis vun de Wieler an der Partei war, fir sech op eng Lëscht opzesetzen an herno näischt méi dovunner wëssen ze wëllen."

An der Mediathéik:

Invité vum Dag / / Carole Schimmer
Lauschteren

Méi zum Thema

Frans Timmermans
Europawahlen 2019

De Spëtzekandidat vun den europäesche Sozialdemokrate seet, traditionell Parteie misste sech nach méi däitlech vun Nationalisten a Populisten distanzéieren. Andeems ee se kopéiert géif ee se stäerken, sou de Frans Timmermans.

Isabel Wiseler-Lima
Europawahlen 2019

Nuancen tëschent dem Wahlmanifest vun der Europäescher Vollekspartei an de Programme vun hiren nationale Memberorganisatioune wieren normal. Dat seet d'Isabel Wiseler-Lima. D'Sensibilitéite wiere vu Land zu Land ënnerschiddlech.

Ulrike Trebesius
Europawahlen 2019

Déi däitsch Europadeputéiert Ulrike Trebesius hält et net fir onméiglech, datt sech no den Europawahlen eng grouss Fraktioun vun den Europa-skepteschen, nationalisteschen a rietspopulistesche Parteien am Europaparlament forméiert.

Carole Thoma
Europawahlen 2019

déi Lénk wier prett fir no den Europawahlen e Vertrieder an dat Europäescht Parlament ze schécken. Dëse soll géint déi multinational Konzerner kämpfen a fir d'Interesse vun de Leit, seet d'Carole Thoma.

Programm

Net verpassen

  • Komponist vum Mount: Ludwig van Beethoven

    Ludwig van Beethoven

    De Ludwig van Beethoven war deen drëtte Ludwig a senger Famill, deen zweete Museker mat deem Numm a bei wäitem de prominentsten. Éiweg krank an dacks onglécklech verléift, war de Beethoven als Mënsch stuer a verbruet, als Komponist rebellesch, onkonventionell a revolutionär.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen