Affär Roberto Traversini Déifferdenger Buergermeeschter envisagéiert Demissioun

Gutt placéiert Sourcë confirméieren, datt de Roberto Traversini envisagéiert de Freideg seng Demissioun als Buergermeeschter ze annoncéieren. Hien huet fir 11 Auer eng Pressekonferenz ugekënnegt. Ob hien demissionéiert, wollt de Roberto Traversini selwer net kommentéieren.

Redaktioun

Roberto Traversini
Roberto Traversini

Nodeems de Roberto Traversini e Mëttwoch zouginn hat, datt d'Gemengeservicer säi Bungalow an der Klenggäertnerzon opgemooss haten, fir Pläng ze zeechnen, kéint elo eng zweet Immobilie an de Fokus geroden. D'Gemengeservicer hätten eisen Informatiounen no och d'Haus vun der Liewenspartnerin vum Roberto Traversini opgemooss. De Roberto Traversini seet op Nofro hin, dës Opmoossaarbechte wiere gemaach ginn, well d'Gemeng een Ament wëlles gehat hätt d'Haus ze kafen.

Dem Buergermeeschter vun Déifferdeng gëtt ausserdeem virgeheit, Aarbechten ouni déi néideg Autorisatioune maache gelooss ze hunn. De Roberto Traversini huet de Bungalow an der Klenggäertnerzon zu Déifferdeng geierft. Nieft deem Haus steet och nach e Gaardenhaus an enger Natura Schutzzon.

Um Haus an um Gaardenhaischen huet de Roberto Traversini verschidden Aarbechten ausféiere gelooss. Fir d'Aarbechten an enger Natura Schutzzon brauch een eng Geneemegung vum Environnement. Déi hat hien eréischt ugefrot, wéi d'Aarbechten ugefaangen haten. Dee Feeler huet de Roberto Traversini schonn d'lescht Woch zouginn - hie wousst net, wou d'Schutzzon géif ufänken.

Och Autorisatioun fir Aarbechten u Bungalow néideg

Wat d'Aarbechten um Bungalow selwer betrëfft, hat de Roberto Traversini e Mëttwoch mat Verweis op d'Gemengereglement gesot, et wier keng Autorisatioun fir d'Renovatiounsaarbechten néideg, déi hie maache gelooss huet, well et net an der Gréngzon, mee an der Klenggäertnerzon géif stoen. De Mike Wagner, éischte Regierungsrot vum Environnement erkläert, datt am Sënn vum Naturschutzgesetz d'Klenggäertnerzon zur Zone verte gehéiert an deemno och fir liicht Aarbechte eng Autorisatioun vum Minister néideg wier.

D'Gelänner vum Haus war iwwerdeems vun der Beschäftegungsinitiativ CIGL gefléckt ginn, ouni Rechnung. De CIGL vun Déifferdeng huet en Donneschdeg matgedeelt, datt déi Aarbechten facturéiert musse ginn. De Roberto Traversini ass President vum CIGL Déifferdeng. D'Beschäftegungsinitiativ huet confirméiert, datt dës Aarbechten net an hirem Objet social leien.

Méi zum Thema

Traversini Haus.JPG
Gaardenhäisschen

Nodeems de Roberto Traversini de Mëttwoch, op Drock vun der Oppositioun hin, Feeler zouginn huet, ginn et méiglecherweis nach weider Problemer fir den Déifferdenger Buergermeeschter. D'Michèle Sinner huet d'Geschicht opgeschafft.

Roberto Traversini
Affär Gaardenhaischen

De Roberto Traversini wëllt verschidde vu senge Mandater ofginn. Eng kloer Decisioun wéilt hien "zimlech kuerzfristeg" treffen. Hie schléisst net aus, eent vu senge politesche Mandater ofzeginn.

Programm

Net verpassen

Dossieren

  • Affär Traversini/Dieschbourg

    De Roberto Traversini ass als Buergermeeschter an Deputéierten zeréckgetrueden. Hannergrond sinn Autorisatioune fir d'Aarbechten un engem Gaardenhaischen an d'Fro, ob hie bevirdeelegt ginn ass.

  • Kuriositéiten aus der Lëtzebuerger Sprooch

    Si oder hatt? Zwee oder zwou? Domat oder domadder? Lëtzebuergesch ass och fir Mammesproochler net ëmmer einfach. Mir ginn der Saach op de Fong.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen