Immigratiounspolitik Den Donald Trump verstoppt sech hanner Ligen

An nëmme sechs Woche goufen op der Grenz tëscht Mexiko an den USA bal 2.000 Kanner vun hiren Eltere getrennt. Esou bal d'Eltere probéieren illegal an d'USA ze reesen, gi si verhaft, an d'Kanner a provisoresch Heemer geschéckt. Dat ass déi radikal Immigratiounspolitik vun der Trump-Regierung.

Philip Crowther / cbi

Analys Philip Crowther

Esou guer d'Melania Trump, d'First Lady, huet sech zu Wuert gemellt, a schéngt hir Oppositioun ze weise géint d'Immigratiounspolitik vun hirem Mann. Si seet, datt d'Land muss mat Häerz regéiert ginn. Mee en Enn vum President senger Auslännerpolitik ass net a Siicht.

Politik vun Null Toleranz

Si gouf offiziell leschte Mount vum Justizminister Jeff Sessions annoncéiert. Et ass d'Politik vun null Toleranz, dat sinn d'Wierder vun der Trump-Regierung. All eenzel Erwuessenen, deen illegal iwwer d'Grenz kennt, gëtt verhaft, d'Kanner, déi et mat iwwer d'Grenz gepackt hunn, mussen a provisoresch Heemer.

Déi éischt Biller vun dësen Heemer, an engem Fall en ale Supermarché, koumen eréischt virun e puer Deeg eraus, an op d'mannst d'Halschent vun Amerika weist sech schockéiert. Dat si gréisstendeels Demokraten. Republikaner melle sech net zu Wuert.

Zwou Wourechten, eng Ligen

Zwou grouss Wourechte ginn an dëser Situatioun confirméiert. Éischtens, den Donald Trump kann an den Ae vu senge Supporter a Wieler maache wat hie well, si wäerten hien net kritiséieren a him ganz sécher net de Réck dréinen. Zweetens, Republikaner am amerikanesche Kongress traue sech net de President ze kritiséieren. Ze vill Angscht hu si vun him ugegraff ze ginn an esou bei den nächste Wahlen erausgeheit ze ginn.

Den Donald Trump weess, datt seng radikal Auslännerpolitik kéint zum Skandal ginn. Mee hie verstoppt sech hanner enger Ligen. Hie seet, datt dës Politik e Gesetz ass, dat vun Demokrate geschaf gouf. Dat ass net wouer. Et ass kee Gesetz, et ass eng Entscheedung vun der Trump-Regierung.

Trump wëllt Wahlverspriechen halen

Mir wësse firwat den Trump a Richtung Kongress kuckt. Seng Republikaner sollen him nei Gesetzesprojete weisen, déi dës Politik kéinten op en Enn bréngen, mee nëmme wann et och vum Kongress genuch Budget gëtt fir dem Trump seng Mauer. Hie wëllt weiderhi säi Wahlverspriechen halen: Eng Mauer op der ganzer Grenz tëscht den USA a Mexiko.

Fir den Ament ass en Enn vun de Verhaftungen op der Grenz a vun den Trennunge vun Elteren a Kanner net a Siicht. Dat ass net dat Amerika, dat si kennen, soen Demokraten. D'Wäisst Haus seet, datt et un der Zäit ass, Häert an null Toleranz ze weisen.

An der Mediathéik:

Chronik / / Philip Crowther
Lauschteren

Méi zum Thema

Philip Crowther Analys
Auslandschronik

An den USA gëtt et keng kloer Aussoen zum Thema vun der Gëftgasattack a Syrien. Tëscht Twitter-Messagen an den offizielle Messagen aus der Regierung ass vill Sputt.

Donald Trump Analys
USA

An der Enquête ëm Verbindunge vum Donald Trump mat der russescher Regierung ass de Michael Flynn e wichtege Bestanddeel. Hie kéint den Trump a Gefor bréngen. Wann deen et net selwer via Twitter mécht.

Net verpassen

  • 23.10. Riicht eraus mam Marc Giorgetti

    RiichtEraus_MarcGiorgetti_horizontal.jpg

    Mam President vum Groupement des Entrepreneurs geet et ëm d'Wunnengskris, déi geplangte Grondsteierreform a säi professionelle Parcours als Bauentrepreneur.

Dossieren

  • CinÉast 2021

    Et ass déi véierzéngt Editioun vum CinÉast Filmfestival. Vum 7. bis de 24. Oktober ginn Featuren a Kuerzfilmer aus Länner aus Mëttel- an Osteuropa gewisen. Siwe Filmer sinn an der Kompetitioun.

  • Bundestagswal 2021

    Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen