De Joel Delvaux kann net novollzéien, datt den Transportminister François Bausch budgetär Grënn uféiert fir z'erklären, datt den Adapto och weiderhi payant soll bleiwe well gesot géif ginn, datt dat keen ëffentlechen Transport, mee éischter en Taxi wier.
De Joel Delvaux kann "et net akzeptéieren, datt eis virbehale gëtt, wéi vill dat de Steierzueler kascht". Et géif de behënnerte Leit "quasi e schlecht Gewësse gemaach" ginn.
Leit mat Behënnerung sinn op Adapto ugewisen
An e bësse méi wei engem hallwe Joer gëtt den ëffentlechen Transport gratis. Am Fong gëllt dat fir jiddwereen, mee Leit mat engem Handicap fillen sech deelweis ausgeschloss, seet de Joel Delvaux:
"Den ëffentlechen Transport soll fir jiddweree gratis ginn - egal wei vill do huet missen investéiert ginn. Ech mengen de Minister François Bausch huet viru kuerzem gesot, datt an de lëschte Joren 30-40 Milliounen an den ëffentlechen Transport investéiert goufe fir dee besser un d'Besoinen unzepassen."
D'Leit wären op dëse Service ugewisen, esou de Joel Delvaux. Ausserhalb vun der Stad Lëtzebuerg wär nämlech nëmme "Minimum" vu Busse fir Leit am Rollstull accessibel:
"Do sinn dann Trapen, oder et si guer keng Plaze virgesinn, fir de Rollstull hinzestellen. An d 'Héicht vun de Quaien ass net esou ugepasst, datt een an de Bus erakéim. Duerfir mussen einfach landeswäit iwwerall Busse fueren, déi esou ugepasst sinn, datt een och mam Rollstull erakënnt."