Chamberwahlen 2018 "Ech hu mech ni fir eng Lëscht interesséiert"

Op der Lëscht vun der Partei Demokratie sinn eng ganz Partie Leit déi soen, si hätten hiren Accord ni ginn, fir Kandidat ze ginn. D'Initiativ, déi eng Lëscht am Süden an am Zentrum deponéiert huet, kritt Manipulatioun virgeheit. Verschidde Betraffener soen, si hätten eng Plainte gemaach.

Maxi Pesch / Michel Delage / Christiane Kleer / cz

Demokratie 2018
Foto vun der Pressekonferenz vum Grupp "Demokratie 2018", dee sech ufanks August opgeléist huet

De Méindeg gouf bekannt, datt eng ganz Rei vun den 23 Kandidaten, déi bei Demokratie op der Süd-Lëscht stinn, eegenen Aussoen no guer net bei de Chamberwahle wëlle matmaachen. Een dovun ass de Louis Speidel vu Bouneweg. Datt hie kandidéiert gouf hien den Dënschdeg de Moie vun engem Kolleeg gewuer.

"Ech war ganz erstaunt, wéi d'Kolleege mir gesot hunn, ech wier do op der Lëscht. Ech hu mech ni fir eng Lëscht interesséiert. Dat ass egal wat."

De Louis Speidel erkläert, datt hie sech iwwerrumpelt gefillt hätt an net wierklech doriwwer opgekläert gi wier, wat hien do géif ënnerschreiwen.

"Eng Fra an e Mann sinn owes op mech a mäi Jong duerkomm. Ech hu geduecht et wier eng Petitiounslëscht (...) op där ech do géif ënnerschreiwen."

Dräi Leit sollen eng Plainte gemaach hunn

Och de Marc Dax vu Bieles gouf aus der Press gewuer, datt hien op der Lëscht vun Demokratie am Süde steet.

"Wat nach méi traureg ass, dat ass, datt och Nopere vu mir op dëser Lëscht am Süde stinn, déi bis elo nach net wëssen, datt si op deene Lëschten drop stinn. Ech hu mat dräi Leit Kontakt gehat, déi eng Plainte bei der Police deposéiert hunn, an déi juristesch wëllen aktiv gi fir vun der Lëscht erofzekommen."

Wat allerdéngs net esou einfach wäert ginn. Well zanter der leschter Woch sinn d'Wahllëschte vun de Bezierksgeriichter am Süden an Zentrum arrêtéiert an d'Wahlziedelen si bestallt. Dem Wahlgesetz no kann ee sech zwar vun enger Kandidatelëscht sträiche loossen, allerdéngs éier dës deponéiert ass.

Sonja Holper: "Entretiene mat Kandidate goufe gewëssenhaft gemaach"

D'Spëtzekandidatin am Zentrum, d'Sonja Holper ass hirersäits iwwerzeegt, datt déi Leit, déi elo op der Kandidatelëschte stinn, opgekläert goufen. Si geet net dovun aus, datt d'Lëscht kéint a Fro gestallt ginn.

"Ech ginn den Owend perséinlech dohin a kucke wat do lass ass. Wann do wierklech e Mëssverständnis war vun de Kandidaten, da gëtt dee selbstverständlech behuewen. Ech sinn awer iwwerzeegt, datt déi Leit opgekläert gi sinn, ëm wat et geet. Déi Leit, déi déi Entretiene gemaach hunn, hunn dat och gewëssenhaft gemaach an de betraffene Leit erlärt, datt et géif drëms goen, fir op eng Lëscht ze goen."

Kritik vun etabléierte politesche Parteien

An der Tëschenzäit ginn et och politesch Reaktiounen zum Thema: de Max Hahn vun der DP schreift op Facebook et wier "dégoutant", "fir eeler Leit hanner d'Liicht ze féieren a vun hirer Guttgleewegkeet ze profitéieren". Den LSAP-Deputéierten Alex Bodry schwätzt vun engem "Verdacht op Bedruch" an och de Sven Clement vun der Piratepartei kritiséiert d'Virgoe vun der Initiativ Demokratie op de soziale Medien.

Ufank August hat déi initial Biergerinitiativ Demokratie 2018 sech wéinst interne Streidereie gespléckt. Entstane sinn zwee verschidde Mouvementer. Op där enger Säit gëtt et d'Partei Fräi Wieler ëm de Lee-Michel Bassegio. Op der anerer Säit gëtt et de Grupp Demokratie, dee vun der Spëtzekandidatin am Zentrum, dem Sonja Holper geleet gëtt an déi am Süden an Zentrum, Kandidatelëschten ofginn huet.

Demokratie zitt Lëschten zeréck

En Dënschdeg den Owend huet Demokratie an engem Pressecommuniqué matgedeelt, datt si d'Wahllëschten am Süden an am Zentrum "opgrond vun der verfuerener Situatioun" wéilt zeréckzéien. Et wéilt een "näischt erzwéngen" an et géif een den "Asaz fir eng gutt Saach" als "gescheitert" ugesinn.


Lauschteren

Méi zum Thema

Demokratie 2018 Exklusiv
Demokratie 2018

Dem Uschäin no huet keen Deputéierten d'Kandidatur vun der Biergerinitiativ Demokratie2018 mat senger Ënnerschrëft ënnerstëtzt. De leschte Freideg haten déi Responsabel vun där Biergerinitiativ dat virun der Press behaapt.

Philippe Poirier
Chamberwahlen 2018

De Politolog Philippe Poirier gesäit och zu Lëtzebuerg an den neie Lëschte virun de Chamberwahlen eng Tendenz, fir de politesche System a Fro ze stellen an eng direkt "Demokratie vum Vollek" ze froen.

Programm

  • Notturno

  • On air

    Virum Dag

  • Noriichten

  • Moies-Magazin

  • Panorama

Dossieren

  • Mënscherechter

    Den 10. Dezember 1948 sinn zu Paräis déi universell Mënscherechter deklaréiert ginn. Um 70. Joresdag vun dëser Deklaratioun steet de Programm vum radio 100,7 ganz am Zeeche vun de Mënscherechter.

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

Communiquéen

  • Communiqué du Conseil d’administration du 100,7

    Le Conseil a décidé de créer un comité de transition présidé par Mme Nancy Braun pour la période du 15/12/2018 jusqu'à l'entrée en fonction du nouveau Directeur (m/f). Mme Michèle Vallenthini est nommée suppléante.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen