Aarbechtsrecht "Ech hu meng Aarbecht gemaach"

"Ech hu meng Aarbecht gemaach", seet den Aarbechtsminister Dan Kersch. Haut Freideg géif hien de Projet de loi, duerch deen den 9. Mee als neie Feierdag soll an de Code du travail ageschriwwe gëtt, am Regierungsrot presentéieren.

Maurice Molitor / cz

Dan Kersch
Dan Kersch

Et misst ee kucken, ob dono nach Adaptatiounen um Text ze maache sinn, oder ob en direkt op den Instanzewee ka geschéckt ginn. A priori géif et awer kee Grond ginn, datt den 9. Mee net schonn dëst Joer e Feierdag kéint sinn, sou den Dan Kersch. D'Neierung vum 26. Congésdag géif a priori just Leit mam gesetzleche Minimalcongé betreffen. Leit, déi haut scho méi fräi Deeg hunn, kéinten net automatesch dovun ausgoen, datt och si en Dag bäikréien.

Ännerunge beim Congé an u Modalitéite fir Recht op Chômage-Indemnitéit

Den Dan Kersch geet awer dovun aus, datt d'Eropsetze vum Minimalcongé Auswierkungen op déi nächst Kollektivvertragsverhandlunge wäert hunn: souwuel d'Patronat, wéi och d'Gewerkschaften hätten dat esou matgedeelt. "Et ass evident, datt d'Gewerkschafte genee an déi do Richtung iwwerleeën: Wann am Kollektivvertrag steet: Minimalcongé plus X, dann ass et evident, datt och deen Dag direkt misst dobäi kommen."

Et wier un de Sozialpartner fir dëse Punkt am Dialog ënnerteneen ze klären, d'Regierung géif sech do net amëschen.

An Zukunft solle Leit, déi vu sech aus kënnegen, ënner gewësse Konditiounen e Recht op eng Chômage-Indemnitéit kréien. All Mënsch kéint a sengem Liewen eng Kéier eng falsch Job-Decisioun huelen. Fir de betraffene Leit en Jobwiessel méi liicht ze maachen, solle si an Zukunft Urecht op eng Chômage-Indemnitéit kréien, fir eng nei Ausbildung ze maachen oder sech op eng aner Plaz kënne virzebereeden.

Grondstee fir Vëlodrom Ufank 2020

Den Dan Kersch geet "ganz staark" dovun aus, datt hien dee Sportsminister wäert sinn, deen de Grondsteen vum Vëlodrom zu Munneref leet. Zweemol schonn hätt hie mat Vertrieder vun der Munnerefer Gemeng zesummegesiess an do confirméiert kritt, datt d'Prozedure lancéiert gi fir d'Terraine fir deen Zweck ze reservéieren.

De Munnerefer Buergermeeschter Steve Reckel confirméiert déi Ausso am 100,7-Interview. A Saache PAG hätt d'Gemeng hir Hausaufgabe scho gemaach, elo misst si nach de PAP ausschaffen. Parallel dozou géif den Architekt - dee jo schonn iwwer Concours erausgesicht gouf - déi konkret Baupläng zeechnen. An zwielef Méint kéint et also lassgoen. Et gëtt mat enger Bauzäit vu knapp véier Joer gerechent, sou datt de Vëlodrom Enn 2023 kéint fäerdeg sinn.

"Eng nei Finanzgestioun fir d'Coque"

An Zesummenhang mat enger Sportsinfrastruktur, déi scho steet: der Coque, huet den Dan Kersch dat bekräftegt, wat am Koalitiounsaccord steet. Nämlech, datt et eng Noutwendegkeet gëtt fir d'Coque, sech nees op hir primär Missioun am Interessi vum nationale Sport ze konzentréieren an net ze vill kommerziell ze denken.

Wann een de Regierungsprogramm an deem Punkt wéilt ëmsetzen, da misst ee konsequenterweis och eng nei Finanzgestioun fir d'Coque op de Wee bréngen. Hie wier iwwerzeegt, datt hien zesumme mat de Verantwortleche vun der Coque nach flott Iddien entwéckele kéint.

An der Mediathéik:

Invité vum Dag / / Maurice Molitor
Lauschteren

Méi zum Thema

Christian Jung
Coque

D'Onstëmmegkeeten tëschent Coque an de Sportfederatioune sinn aus der Welt geschaaft. Dat seet den neien Direkter vun der Coque, de Christian Jung. Hie gëtt zou, datt verschidde Kritike berechtegt waren.

Coque
Sport

Um rezente COSL-Kongress huet virun allem d'Dëschtennis-Federatioun d'Coque kritiséiert: Et goung ënner anerem ëm Servicer, déi a Rechnung gestallt gi sinn an ëm d'Héicht vun eenzelen Tariffer.

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Sozialwahlen 2019

    Den 12. Mäerz ware Sozialwahlen. A ronn 3.800 Betriber, an deene méi wéi 15 Leit schaffen, goufen d'Personaldelegatioune bestëmmt. An déi 60 Vertrieder an der Salariatskammer goufen nei gewielt.

Communiquéen

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen