Chamberwahlen 2018 "Ech regrettéieren, datt mir deemools net mat der CSV geschwat hunn"

15 Joer war den Alexander Krieps fir d'DP Deputéierten an der Chamber. Dës Kéier geet hien net méi mat an d'Wahlen. Réckbléckend seet hien, datt een 2013 eng CSV-DP Koalitioun hätt kéinten envisagéieren. Koalitioune géifen awer net vu politesche Parteie gemaach ginn, mee vum Wieler, an dat misst ee respektéieren.

Mick Entringer / cbi

Alexander Krieps
Den Alexander Krieps hätt sech 2013 eng CSV-DP Koalitioun virstelle kënnen.

De liberale Politiker an Dokter huet dernieft awer och d'CSV kritiséiert, well si sech an der Oppositioun net nei opgestallt hätt a well si mat enger paternalistescher Attitüde an d'Wahle géif goen. De Alexander Krieps huet e generell positive Bilan vu der aktueller Regierung gezunn, woubäi een awer an der Gesondheetspolitik net wäit genuch gaange wier.

Verdéngscht vun Direkteren: Skandaléis

D'Fleegeversécherung géif mëttlerweil 700 Milliounen Euro d'Joer kaschten, an den DP-Politiker fënnt et skandaléis, datt d'Direktere vun deene Reseaue méi wéi 30.000 Euro de Mount géife verdéngen. Do géifen nach véier Sousdirekteren dobäikommen. "Dat si pur ëffentlech Gelder. Ech wier frou, wann d'Cour des comptes deen Dossier mol géif an d'Hand huelen", esou den Alexander Krieps.

Weider seet den DP-Deputéierten, datt een d'Struktur vun den Aides à domicile misst vun de Soins à domicile misst trennen, dat wier déi logesch Konsequenz. "Ech gesinn net an, datt an deene Reseauen d'Botzfra op iwwer 50 Euro d'Stonn facturéiert gëtt."

Spideeler: Verbesserungen néideg

De Spidolsplang géif zu engem groussen Deel d'DP-Handschrëft droen, an do wieren nach Saachen, déi misste verbessert ginn:

"Dir maacht keng Reform vun der Medezin ouni d'Dokteren. Dat ass e fundamentale Punkt deen ech Iech soen. An der Sécurité sociale, dat koum och déi leschten Deeg erëm op, dat stoung am Regierungsprogramm, do ass guer näischt gemaach ginn, also et hätt kënne vill méi gemaach ginn."

Et wiere vill Annonce gemaach, awer wéineg duerchgesat ginn. "An de leschte Skandal ass d'Zesummeleeë vun der Psychiatrie mam Hôpital général zu Ettelbréck. Dat ass e Skandal.", esou den Alexander Krieps.

Den Akzent op d'Lëtzebuerger Sprooch an Identitéit an der Wahlcampagne vun der DP a vun anere Parteien, gesäit den Alexander Krieps net als Zeeche vun engem nationalistesche Ruck no riets bei der DP. Déi vill Diskussiounen iwwer d'Lëtzebuerger Sprooch wieren, dem Alexander Krieps no, just "en Trend", deen erëm géif eriwwer goen. De 72 Joer ale liberale Politiker geet net méi mat an déi nächste Wahlen.

An der Mediathéik:

Invité vum Dag / / Mick Entringer
Lauschteren

Méi zum Thema

De Franz Fayot an de Sven Clement
Chamberwahlen 2018

D'Leit solle keng Angscht virun der Digitaliséierung hunn, mee sech dorop virbereeden, seet de Sven Clement vun der Piratepartei. Fir de Franz Fayot ass et wichteg, datt d'Gesellschaft jiddweree mathëlt.

Christiane Kleer Analys
Chamberwahlen 2018

D'Situatioun an der Educatioun schéngt sech entspaant ze hunn. An dat obwuel den Educatiounsminister iwwer 40 nei Gesetzer op den Instanzewee bruecht huet. E Bilan vum Claude Meisch senger Educatiounspolitik.

Christian Kmiotek & Line Wies
Chamberwahlen 2018

Zu Lëtzebuerg géif et kee Problem vum Mindestloun ginn, mee e Problem vun de Liewenskäschten, seet de Christian Kmiotek (déi gréng). Hie fuerdert "méi Netto vum Brutto". Déi Lénk fuerderen e Mindestloun vun 2.380 Euro bis 2022, sou d'Line Wies.

D'Françoise Hetto-Gaasch (CSV) an d'Marceline Waringo (KPL)
Chamberwahlen 2018

Den Handel brauch dringend e Kollektivvertrag. Do si sech d'Françoise Hetto-Gaasch (CSV) an d'Marceline Waringo (KPL) eens. Dëst misst awer am Dialog mam Patronat a Gewerkschafte geschéien.

Programm

Dossieren

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Dateschutz

    De 25. Mee trëtt an der EU en neit Dateschutzreglement a Kraaft. Wat bedeit dat fir d'Bierger an d'Betriber? A wat ännert wierklech? Detailer an eisem Themeschwéierpunkt.

Communiquéen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen