Chamberwahlen 2018 Eidel Wunnengen: leerstandsmelder.lu gouf relancéiert

Virun de Chamberwahle gouf de sougenannte Leerstandsmelder reaktivéiert. D'Leit ginn do opgeruff, Wunnengen an Haiser, déi eidel stinn, um Site leerstandsmelder.lu ze mellen. De Leerstandsmelder war scho viru véier Joer lancéiert ginn. Mee e war politesch onerwënscht, an d'Initiateure krute vu Politiker gesot: "Mir këmmeren eis ëm déi eidel Wunnengen, ënner der Konditioun, datt de Leerstandsmelder offline geet". Véier Joer drop wier awer näischt geschitt, an dofir gouf d'Initiativ kuerz virun de Chamberwahle relancéiert. De Pierre Reyland huet mam Responsabelen, David Kieffer, geschwat.

Pierre Reyland / cz

Leerstandsmelder
David Kieffer

David Kieffer: Leerstandsmelder ass eng Website, op där d'Leit eidelstoend Gebaier melle kënnen, souwuel privater, wéi och staatlecher. Si kënnen eng Adress a weider Informatiounen uginn, zum Beispill wann et ee Problem mat enger Baugeneemegung gëtt oder wa si wëssen, datt et e Spekulatiounsobjet ass.

Mir sammelen déi Informatiounen iwwer Leerstand a kënnen doduerch de Problem méi genee beschreiwen.
Pierre Reyland: Dir hutt dëse Projet jo eigentlech iwwerholl, wie stécht dohannert?
Ech an e Grupp jonk Lëtzebuerger, déi der Meenung sinn, datt net genuch geschitt, fir de Leerstand ze bekämpfen. Grad bei den aktuelle Präisser muss all Méiglechkeet ausgeschöpft ginn, fir déi Kris e bëssen ofzedämpfen a Leerstand ze notzen.
Et sollt ee fir d'éischt emol de Leerstand bekämpfen, amplaz rise Projeten aus dem Näischt wëllen ze zéien, déi dann dono net sou séier kënnen ëmgesat ginn, wéi geduecht.
Firwat hu Dir decidéiert fir de Leerstandsmelder ze reaktivéieren?
2014 war d'Säit relativ séier offline gaangen, well d'Politik gesot huet, datt d'Konzept net erwënscht wier, an datt et aner Weeër géif ginn, fir de Leerstand an Ugrëff ze huelen. Et sinn och implizit Verspriechunge gemaach ginn. Véier Joer méi spéit gesi mir, datt an déi Richtung net vill geschitt ass.
Kënnt Dir och mat Gemenge schaffen? Déi hu jo Informatiounen an Daten iwwer Wunnengen, déi eidel stinn.
Dat wier wënschenswäert, mee Gemenge sinn an där Hisiicht net immens kooperativ. Déi kéinte ganz liicht déi Statistike maachen, déi mir eis leider erschaffe mussen, mat Hëllef vun der Crowd, vun de Leit, déi matmaachen. Mee fir eng Gemeng wier et wierklech net schwéier, fir erauszefannen, wat eidel steet.
Wa keng Poubelle muss eidel gemaach ginn, a kee Waasser verbraucht gëtt, da steet een Haus eidel. Ech huelen un, dat wiere vläicht een oder zwee Schaffdeeg, da wéisst ee ganz genee an de Gemengen, wéi eng Gebaier eidel stinn an da kéint ee sech dru maachen, ze kucke firwat dat de Fall ass, an da kann een och nees kucken, fir dee Wunnraum fir d'Allgemengheet accessibel ze maachen.
Hu Dir scho konkret Beispiller?
Zemools an der Stad Lëtzebuerg hu mir gefuerscht a gekuckt, wat eidel steet. Mir hunn och mat Leit geschwat an du gesinn, datt et eng considerabel Unzuel un Objeten ass. Wann een eleng schonn an engem Quartier kuckt. All Mënsch fält dat eent oder anert Haus an. Mir wëllen einfach méi Informatiounen dozou generéieren. Déi Informatioune sinn net do, de Staat an d'Gemenge wëlle se net stellen, also ass et un de Bierger fir eppes ze ënnerhuelen, fir datt eppes geschitt.
Wann elo Privatleit hiert eidelt Haus oder hir Wunneng bei Iech um Site gesinn, da kéint et sinn, datt déi sech perséinlech ugegraff fillen ...
Jo, dat ka sinn. Ech muss dozou awer soen, datt keng Nimm vu Proprietäre genannt ginn. Mir weise just Fotoe vum Gebai, fir datt d'Leit sech eppes drënner virstelle kënnen. Mir nennen och nach d'Adress, mee dat sinn alles ëffentlech zougänglech Informatiounen. Mir wëllen och wëssen, firwat een Objet eidel steet. D'Leit kënnen um Site kommentéieren, de Proprietär ka sech och äusseren an eng Erklärung ofginn. A wann dat esou an engem Dialog geschitt, da kann een dono och wierklech Ursaachefuerschung maachen an erausfannen, wat schlussendlech d'Grënn hanner dem Leerstand sinn.
Dir hat virdru gesot, datt deemools de Leerstandsmelder vun der Politik net erwënscht gewiescht wier. Wéi ass dat elo? Sinn d'Politiker sech bewosst, datt deen elo reaktivéiert gouf a krut Dir elo nees Informatiounen?
Déi wäerten dat elo gewuer ginn, an da sinn ech gespaant, wat si dozou soen. Rechtlech gesi gëtt et kee Problem. Ech sinn op all Zort vu Feedback gespaant, oder ob si wäerte versiche sech dolaanscht ze drécken a sech net musse mat der Thematik ze befaassen.

An der Mediathéik:

Chamberwahlen 2018 / / Pierre Reyland
Lauschteren

Méi zum Thema

Kichegespréicher #1 - Ëmwelt, Educatioun a Logement
Chamberwahlen 2018

An de Kichegespréicher stelle sech jonk Kandidatinnen a Kandidaten an engem relaxe Kader de Froe vu jonke Wielerinnen a Wieler. An der éischter Episod geet et ëm Ëmwelt, Educatioun an ëm Logement.

Eric Rosin
Invité vum Dag

Deen neien Direkter vum Fonds du Logement Eric Rosin huet sech als Prioritéit gesat erëm Rou a seng Verwaltung ze bréngen. Déi méi wéi 100 Mataarbechter solle kënne méi matschwätzen.

Guy Entringer.JPG
Société nationale des habitations à bon marché

D'SNHBM wëllt e Projet mat 750 Haiser an Appartementer zu Ollem realiséieren, op engem eegenen Terrain vu 27 Hektar. De Projet soll eng héich Liewensqualitéit garantéieren.

Dossieren

  • Mënscherechter

    Den 10. Dezember 1948 sinn zu Paräis déi universell Mënscherechter deklaréiert ginn. Um 70. Joresdag vun dëser Deklaratioun steet de Programm vum radio 100,7 ganz am Zeeche vun de Mënscherechter.

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

Communiquéen

  • Communiqué du Conseil d’administration du 100,7

    Le Conseil a décidé de créer un comité de transition présidé par Mme Nancy Braun pour la période du 15/12/2018 jusqu'à l'entrée en fonction du nouveau Directeur (m/f). Mme Michèle Vallenthini est nommée suppléante.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen