Bilan EU-Kommissioun En digitale Bannemaart ouni Grenzen?

D'Schafen vun engem digitale Bannemaart, ouni Grenzen an ouni Hindernisser: dat war eng vun den zéng Prioritéiten, mat deenen d'Kommissioun-Juncker am Joer 2014 ugetrueden ass. Wann aus 28 nationalen Digital-Mäert een eenzegen gëtt, da kéinten doduerch, esou gouf deemools gesot, Honnertdausende vun neien Aarbechtsplaze geschaf a Recettë vu méi wéi 400 Milliarden Euro d'Joer generéiert ginn.

Maurice Molitor / cbi

Geoblocking an der EU
De Problem vum Geoblocking ass an der EU nach ëmmer net geléist. Foto: Bigstock / tanaonte

"Souguer d'Technik-Freake wéi ech wëssen, datt d'Technologie eis Zukunft muss sinn", seet de Jean-Claude Juncker, net ouni Selbstironie, an engem Videoclip um Site vun der Europäescher Kommissioun, an deem de President himself erkläert, firwat den digitale Bannemaart eng vun de Prioritéite vu senger Kommissioun ass.

Déi grouss digital Entreprisë sëtzen an den USA, hir Computere kommen aus China. Europa huet den Zuch iergendwéi verpasst: Zil war an ass et, de Retard opzehuelen.

De Retard ophuelen

"Dafür ist eine wichtige Voraussetzung, dass die europäische Politik digitalpolitische Initiativen vernetzt denkt, sie also mit Cybersicherheit beispielsweise oder mit regionalpolitischen Themen zusammen denkt und auch auf industriepolitische Anliegen wie die Modernisierung von etablierten Industriezweigen ausdehnt."

seet de Robert Stüwe vum Zentrum fir europäesch Integratiounsfuerschung op der Uni Bonn: Deen Zentrum huet genee gemonitored, wat geschitt ass am Laf vun de leschte fënnef Joer, bei den zéng Prioritéiten, also och am digitale Bannemaart.

Ënner de Begrëff "digitale Bannemaart" fale ganz ënnerschiddlech Stéchwierder wéi Dateschutz a Kënschtlech Intelligenz, Droits d'auteurs a Geoblocking, 5G-Infrastruktur an Digitalsteier. A wann een dat alles zesumme kuckt, da kéim een op e gemëschte Bilan, seet den Andrea Renda, Chercheur um Centre for European Policy Studies zu Bréissel.

E gemëschte Bilan

Op där enger Säit huet d'Kommissioun staark Decisiounen duerchgesat a Saachen Dateschutz a Copyright, op där anerer Säit ass den digitale Marché am Kär ëmmer nach esou wéi e viru fënnef Joer war: extrem fragmentéiert, onfäeg den Entreprisen a Konsumenten e komplett integréierte Marché ze bidden, an deem all Servicer fir all Konsumenten zougänglech sinn, egal wéi hir Postleitzuel ass.

Zwar ass zanter Dezember zejoert en europäescht Reglement voll a Kraaft, dat Geoblocking verbitt, mee dat huet sech nach net iwwerall ronderëm geschwat, schéngt et: ëmmer nach si Videoen an dësem Land net available, a kënne Päck an dat anert Land net geliwwert ginn.

Et bleiwe vill Chantieren

Mee wéinstens gëtt et do schonn e Reglement, wat an anere Beräicher nach net de Fall ass: "Et gëtt eng ganz Rei vun Themen - e-Privacy, Digitalsteier a vill anerer - wou d'Initiative vun der Kommissioun sech net a Form vu konkrete politesche Mesurë konkretiséiert hunn.", seet de Spezialist a Saachen digital Ekonomie, den Andrea Renda.

E faire Modell fir eng Besteierung vun de Internetgiganten à la Google, Facebook a Konsorten, op déi d'Europäer sech bis elo net verstännege konnten, ass dee vläicht gréissten Echec gewiescht. Déi nächst Kommissioun wäert do en neien Ulaf huele mussen.

5G bleift en Dossier fir déi nächst Kommissioun

Och a punkto Opbau vum 5G-Reseau fir déi nei Generatioun vun der mobiller Dateniwwerdroung wier net genuch ënnerholl ginn, fënnt den Andrea Renda. De Robert Stüwe vun der Uni Bonn ass domat awer net ganz averstanen:

"Also bei der 5G Infrastruktur fällt die Verantwortung mit Sicherheit nicht allein der Europäischen Kommission oder dem Europäischen Parlament zu. Das ist auch eine zentrale Zuständigkeit der Mitgliedsstaaten, Netzinfrastruktur aufzubauen und auf nationaler Ebene die nötigen Vorkehrungen zu treffen um einen möglichst zügigen Ausbau der 5G-Infrastruktur sicherzustellen."

Och fir déi nächst Kommissioun wäert den digitale Bannemaart eng Prioritéit bleiwen. Bleiwe mussen. Si wäert engersäits nohuelen, wat dës Kommissioun net hikritt huet. An da stelle sech hir och schonn nei Erausfuerderungen: Kënschtlech Intelligenz, den Internet of Things, a wie weess schonn haut, wat net nach alles.

Fakt ass awer och: d'Kommissioun eleng kann d'Defien net meeschteren. Si brauch d'Parlament, d'Memberstaaten. An, an de meeschte Fäll och de private Secteur.

An der Mediathéik:

Aktuelles / / Maurice Molitor
Lauschteren

Méi zum Thema

Europäesch Investitiounsbank
Europäesch Wirtschaft

De Juncker-Plang sollt d'Investitiounen an Europa nees undreiwen. 500 Milliarden Euro sollten zousätzlech an d'Wirtschaft investéiert ginn. Dat Zil schéngt erreecht ze sinn. E Bilan vum Stephan Polet.

Philippe Lamberts
Europapolitik

De belschen Europadeputéierte Philippe Lamberts hat 2014 am Europaparlament fir de Jean-Claude Juncker gestëmmt, mee géint seng Kommissioun. Hie weist sech awer enttäuscht vum Lëtzebuerger.

Big Crunch - Euranet Plus Presidential Debate with European Commission presidential candidates.
#EuranetPlusSummit2019

Den Nach-EU-Kommissiounspresident Jean-Claude Juncker zitt e Bilan vun der Aarbecht, déi d'EU-Kommissioun déi lescht fënnef Joer geleescht huet an hie stellt sech de Froe vum Reseau Euranet Plus.

Programm

Dossieren

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen