Wéi geséiche bei engem Brexit-"no deal"-Zeenario déi zukünfteg Aktivitéite vun der Cargolux aus? Dat ass also eng vun de Froen, ëm déi et fir de Grand-Duché geet. Bei der Lëtzebuerger Cargo-Airline mécht Groussbritannie ronn siwe Prozent vum weltwäite Volume vun hiren Operatiounen aus.
De Conseiller vum Mobilitéits-Ministère Sam Weissen schwätzt vu "relativ sophistiquéierte Rechter" vu Lëtzebuerg fir d'Volle vun der Cargolux, "déi net nëmme vun engem Punkt op deen anere ginn, wéi Findel-London an zeréck, wat eng Basis-Connectivitéit ass, mee e bësse weider, mat drëtte Punkten. Do geet et besonnesch drëms och d'Relatioune China-UK, Afrika-UK, USA-UK oprecht ze erhalen", sou de Sam Weissen.
D'EU-Kommissioun hat hir Virschléi fir dat geplangte Reglement mat den Noutmesurë fir een eventuellen haarde Brexit virun enger Rei Woche presentéiert. Wann den Text am EU-Conseil esou géif bestoe bleiwen, wéi e vum Mobilitéits-Ministère reviséiert gouf, da kéint d'Cargolux weider fléie wéi bis elo.
E bilateralen Accord mat Groussbritannien ofschléissen?
Wann dat geplangte Reglement net géif ugeholl ginn oder déi spezifesch Cargo-Rechter net ofgedeckt wieren, da misst Lëtzebuerg eventuell op de Wee vun engem bilateralen Accord mat Groussbritannie goen, explizéiert de Sam Weissen.
Wa Lëtzebuerg seng Interessen net duerchgesat kréich, da wiere juristesch Schrëtt net ausgeschloss, esou de Beamte vun der permanenter Lëtzebuerger Vertriedung bei der EU.
Wéinst der Fro vun de Lëtzebuerger Interessen am Aviatiounsberäich am Kontext Brexit, hat de Minister François Bausch am November d'lescht Joer e Bréif un d'EU-Kommissioun geschéckt.
Weidere Verlaf vu Verhandlungen ongewëss
Am Dezember 2018 hätt de Xavier Bettel nach emol Drock gemaach. Doropshin hätt ee vun der EU-Kommissioun Äntwerte kritt, déi net zefriddestellend gewiescht wieren, sou de Sam Weissen. "An elo hu mir een Accord op den Text op der Säit vum Conseil, wou d'Memberstaate sëtzen, dat ass elo d'Hallschent vum prozedurale Wee."
Dës Woch geet et viru mat de Verhandlunge mam Europaparlament. Dem Sam Weissen no wéisst een net genee, wat dobäi erauskéim. Den Afloss vu Lëtzebuerg op d'Verhandlunge mam Europaparlament wier nëmme limitéiert. Nieft der Fro, wéi d'Cargolux viru fléie kann, geet et ëm d'Fro, ob Lëtzebuerg seng Kompetenz fir Fluchrechter auszehandelen un d'EU-Kommissioun ofgëtt.
Lëtzebuerg huet Noutmesüren ausgehandelt
Wann d'Propositioun esou géif ugeholl ginn, wéi se ufanks formuléiert war, "dann hätte mir effectivement eis Kompetenz ganz un d'EU ofginn", sou de Sam Weissen. "Domat hätt Lëtzebuerg och keng Flexibilitéite méi gehat fir selbststänneg Accorden, Rechter auszehandelen. Wat problematesch ass, well mir trotzdem mat Cargolux éischter an engem Nischen-Domaine sinn, a spezifesch Rechter brauchen."
Fir de Moment wier virgesinn, datt Lëtzebuerg seng Kompetenz nëmmen esou laang misst ofginn, wéi eventuell Noutmesurë gëllen, esou de Sam Weissen. Wann d'Noutmesuren nees ausser Kraaft gesat ginn, kritt Lëtzebuerg seng Kompetenzen nees zeréck.
D'Noutmesuren, déi de Moment viru verhandelt ginn, trieden nëmmen a Kraaft, wann et zu engem Brexit ouni Accord kënnt. An deem Fall géif de Grand-Duché also national Kompetenzen oftrieden, an nom Enn vun den Noutmesuren zeréckkréien. Dat hätt ee kënnen aushandelen, seet de Sam Weissen.