Gemengewahlen "Eng ongesond Elengherrschaft zu Diddeleng"

An der Gemeng Diddeleng ass et d'Zil vun der Oppositioun, déi absolut Majoritéit vun der LSAP ze briechen. Am Face-à-face mam LSAP Buergermeeschter Dan Biancalana huet d'CSV-Spëtzekandidatin Michèle Kayser-Wengler der Majoritéit virgehäit, d'Oppositioun net eescht ze huelen. Differenze gëtt et beispillsweis beim soziale Wunnengsbau, eens ass een sech dogéint iwwer méiglech Léisunge vum Verkéiersproblem.

Michel Delage

Michèle Kayser-Wengler an Dan Biancalana
Michèle Kayser-Wengler (CSV) an Dan Biancalana (LSAP)

"Mir fillen eis heiansdo e bësselchen net ganz serieux geholl vun der absoluter Majoritéit", sot d'Michèle Kayser-Wengler (CSV). "Mir vermëssen e konstruktiven échange de vues an e serieuxen Dialog mat deenen anere Parteien am Gemengerot."

Wann d'Gemeng beispillsweis e Vertrieder an e Syndikat muss schécken, da géif systematesch en LSAP-Conseiller virgeschloe ginn. D'Oppositioun géif net emol gefrot ginn, sou d'CSV-Spëtzekandidatin. An hirem Wahlprogramm schwätzt hir Partei vun enger "ongesonder Elengherrschaft" vun de Sozialisten.

LSAP-Majoritéit schmëlzt vu Wahl zu Wahl

"90% vun deene Projeten, déi d'LSAP erabruecht huet, huet d'Oppositioun och matgedroen", huet de Buergermeeschter Dan Biancalana op de Virworf geäntwert.

Seng Partei huet am Diddelenger Gemengerot zéng Sëtz vun am ganzen 17, d'CSV huet dräi Sëtz, Déi Gréng der zwee an Déi Lénk an ADR all Kéiers ee Vetrieder. Vu Wahl zu Wahl ass déi absolut Majoritéit vun der LSAP op ongeféier 54% geschmolz.

Dem Buergermeeschter no géif sech de Bilan vun deene sechs leschte Jore weise loossen. ""Mir hunn e staarke Moderniséierungsprozess matgemaach, mir hu ronn 100 Milliounen € an déi ëffentlech Infrastrukturen investéiert". Diddeleng wier eng "ganz dynamesch Stad mat Potential", sou den Dan Biancalana.

Net genuch erschwéngleche Wunnraum

Zu Diddeleng kënne sech ëmmer manner Leit mat niddregem Akommes eng Wunneng leeschten, sief et fir ze kafen oder fir ze lounen. Virun allem am soziale Wunnengsbau wier "e bësse geschlof ginn", seet d'Michèle Kayser-Wengler.

Zum Beispill hätt d'Gemeng bei zwee private Bauprojeten an de Quartieren "Am Duerf" a "Lenkeschléi" ze wéineg Wunnenge kaf. Des weidere wier net genuch Bauterrain kaf gi fir e kommunale Wunnengsplang fir bezuelbare Wunnraum an d'Weeër ze leeden.

CSV proposéiert, um Beispill vu Monnerech, "Start up"-Wunnengen ze schafen. Jonker no der Léier oder nom Studium kéinten do fir dräi Joer an zu engem moderate Loyer wunnen. Eng 20 bis 30 där Wunnenge kéint si sech an den nächste sechs Joer virstellen, sou d'Michèle Kayser-Wengler.

"Am Wunnengsbau mécht een net genuch"

De Buergermeeschter stellt dogéint an d'Vitrine, wat seng Majoritéit an der leschter Legislatur geleescht hätt, dorënner "88 Wunnengen, wou déi sozial Kritère spillen". Nieft Projete mat der Société nationale des habitations à bon marché (SNHBM) hätt d'Gemeng Diddeleng ënnert anerem hire Stock u Gemengewunnengen op 40 eropgeschrauwt.

An den nächsten zeng bis 15 Joer da gi sech eng 1.000 Wunn-Unitéite mam Projet "Neischmelz" op de Friche versprach. Och do soll déi sozial Mixitéit spillen, seet den LSAP-Politiker. "Am Wunnengsbau mécht een net genuch, et ass jo och en nationale Problem", erkläert den Dan Biancalana.

LSAP an CSV op enger Linn beim "shared space"

Nieft dem Wunnen ass de Verkéier ee vun de grousse Problemer zu Diddeleng. Dausende franséisch Frontaliere fueren all Dag iwwer Diddeleng fir an d'Stad an nees zeréck. Dat suergt fir Stau op den Autobunnen an am Stadkäer. Iwwer méiglech Léisungen an deem Beräich si sech op d'mannst LSAP an d'CSV relativ eens.

Beim "shared-space", der Zone 20, déi sech Autoen, Veloen a Foussgänger deelen, ass déi éischt Phas scho Realitéit. "Wann déi zwou aner Phasen ëmgesat sinn, dann ass et net méi esou attraktiv fir duerch den Zentrum ze fueren", den Duerchgangs-Verkéier géif dann op d'Niewestrooss ëmgeleet ginn, erkläert d'CSV-Spëtzekandidatin.

"Majoritéit huet net tough genuch mat der CFL verhandelt"

Beim ëffentlechen Transport ass de Problem d'Ofschafung vun direkten Zuchlinnen tëschent Volmerange-les-Mines (Frankräich), Diddeleng an der Stad Lëtzebuerg. "D'Majoritéit huet net tough genuch mat der CFL verhandelt", kritiséiert d'Michèle Kayser-Wengler. D'Gemeng wéilt dem Minister Mëtt Oktober eng deementspriechend Petitioun iwwerreeschen, sou den Dan Biancalana.

Des weidere gëtt zu Diddeleng d'Iddi vun engem "Train-Tram" tëschent Volmerange a Biereng, am Idealfall dann och bis an d'Stad diskutéiert. D'Barrièren ewech huele géif och de Stau reduzéieren, versprécht d'CSV-Spëtzekandidatin.

Fir den LSAP-Buergermeeschter misst een de Verkéiers-Problem "moderat usteieren", well och d'Entwécklung vun Diddeleng matgeduecht misst ginn. Dem Dan Biancalana no gëtt et zwou Optiounen: en direkten urbanisteschen Agrëff fir méi Zich a Richtung Stad Lëtzebuerg oder de Projet "Train-Tram". Béid Optioune misst een tëschent de Parteien am Gemengerot an och mat de Bierger diskutéieren.

An der Mediathéik:

Invité vum Dag / / Michel Delage
Lauschteren

Méi zum Thema

Table Ronde iwwert Finanzen an Integratioun a klenge Gemengen
Gemengewahlen

Mat der Reform vun de Gemengefinanze ginn et Gewënner a Verléierer. Wat bedeit dat fir déi politesch Prioritéiten an de Gemengen? Wat gëtt fir d'Integratioun an d'Participatioun vun Auslänner gemaach?

Wahlplakater
Gemengewahlen

D'Parteie sinn am Gemengewahlkampf net alleguer gläich. Souguer ënnert "klenge Parteie" ginn et grouss Ënnerscheeder. Wéi eng Contrainten hunn d'KPL, d'Piratepartei, Déi Lénk an d'ADR?

Laurent Zeimet a Guy Frantzen
Gemengewahlen

Eng Koalitioun mat der ADR keim fir si net a Fro, sou d'Spëtzekandidaten vun CSV an LSAP zu Beetebuerg. All déi aner Koalitiounsoptiounen halen de Laurent Zeimet an de Guy Frantzen sech awer op.

vum Debat ausgeschloss
Gemengewahlen

Nei Critèrë schléisse kleng Parteie vun den offiziellen Table rondë virun de Gemengewahlen aus. Concernéiert sinn d'KPL an d'Piratepartei. Sinn dat willkürlech a souguer antidemokratesch Moossnamen?

Programm

  • Iwwer Mëtteg

  • On air

    Resonanzen

  • Spektrum

  • Ënnerwee

  • Noriichten

Net verpassen

  • The English guy is coming!

    Jim Kent.jpg

    "I'm really happy to be back on air in the Grand Duchy, which is where it all started for me and will endeavor to fill the airwaves with humorous and insightful observations on Luxembourg life combined with the best guests and music that you have come to expect from 100,7."

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen