Klimaschutz Eng Plainte géint de Staat

De Mouvement écologique envisagéiert eng Plainte géint d'Regierung, wa bis Enn dës Joers keng ambitiéis Klimaschutzmesurë virgeluecht ginn. Dat huet d'Presidentin vun der ONG, d'Blanche Weber, de Moien am 100,7-Interview annoncéiert. Am Ausland géifen et dofir genuch Virbiller ginn, an eng juristesch Upak géif een och fannen.

Pia Oppel / cbi

Cedric Metz Blanche Weber
De Cédric Metz an d'Blanche Weber vum Mouvement écologique.

"Et gëtt jo Virbiller. A Frankräich gëtt jo eng Plainte deposéiert. Et gi schonn eng Rei juristesch Upaken. Mee mir sinn nach net sou wäit. Mir setzen drop, datt d'Regierung dat op den Dësch leet. Mee am Ablack spiert een net, datt d'Regierung wëllt an de Fong vum Problem aklammen. Dowéinst ass all Meenungsäusserung, déi dat bëssi méi fundamental thematiséiert, exzellent. Well wann de Mëtteg d'Schüler op d'Strooss ginn, ass dat jo an deem Sënn ee Qualitéitssprong: Mir ginn interpelléiert, mir als Erwuesse schwätzen zanter 20 Joer iwwer Klimaschutz an all kéiers wann eppes soll gemaach ginn, dann zerriede mir et oder schwätzen iwwerhaapt net driwwer, an herno geschitt näischt."

D'Ëmweltorganisatioun erwaart sech, datt ënner anerem d'Schülermanifestatioune fir méi Klimaschutz een Impakt op d'Politik wäerten hunn. An enger Demokratie kéint een esou eng weltwäit Beweegung net ignoréieren, mengt de Cédric Metz. D'Initiativ vun de Schüler wier eng "genial Ergänzung" zur Aarbecht vun den Ëmwelt-ONGen. Et géif och vereenzelt Kontakter ginn, zum Beispill hätt de Mouvement de Schüler Raimlechkeeten zur Verfügung gestallt, fir sech ze organiséieren. Et wéilt een déi Jonk awer net "instrumentaliséieren", esou de Cédric Metz.

Steieren a Klimapolitik

De Steiersystem misst méi ekologesch a méi sozial ginn, äntwert d'Blanche Weber op d'Fro, ob d'Autossteier nom Prinzip vum "Pollueur-Payeur" ugepasst ginn, sou datt ee fir Autoe mat décke Motore méi misst bezuelen. Et géif also kee Sënn maachen, eng Mesure erauszepicken an eenzel ze diskutéieren. Mee se misst Deel vun engem ganze Mesurëpak sinn. Eng Upassung vun der Autossteier wier awer sécherlech néideg, well Lëtzebuerg géif ëmweltschiedlecht Verhalen allgemeng kaum besteieren.

Den LSAP-Parteipresident Franz Fayot hat rezent an engem Lieserbréif am Wort gefuerdert, datt Autoe mat décke Motore méi besteiert géife ginn.

Kuerz drop an engem RTL-Interview huet hie sech méi virsiichteg ausgedréckt a betount, datt hien näischt géint SUVen hätt, an eng méi ambitiéis Klimapolitik wier och éischter eppes, wouriwwer ee fir eng nächst Legislatur sollt nodenken.

D'Akzeptanz vun Ëmweltschutzmesurë géif vun zwee Facteuren ofhänken, seet d'Blanche Weber: Datt se effektiv de gewollten Impakt hunn, misst kloer sinn, an datt se sozial gerecht sinn. D'Regierung géif am Abléck dobäi versoe "fir eng Strategie op den Dësch ze leeën, mat wat mir wëlle wat erreechen." Déi geplangten Hausse vun den Accisen op Bensin an Diesel hätt op de Klimaschutz zum Beispill guer keen Impakt.

Fräihandel a Klimapolitik

De Mouvement fuerdert och eng kloer Ausso vun der blo-rout-grénger Koalitioun, wéi se zu de geplangten neie Verhandlungen iwwer ee Fräihandelsofkommes tëschent der EU an den USA steet. Soulaang d'USA de Paräisser Klimaaccord net respektéieren, dierften der ONG no keng esou Verhandlunge geféiert ginn.

An der Mediathéik:

Invité vum Dag / / Pia Oppel
Lauschteren

Méi zum Thema

Tankstell
Accisen um Sprit

D'Accisen op de Sprit solle gehéicht ginn. De Liter Bensin soll een Cent méi kaschten, den Diesel zwee Cent. Wéi eng Konsequenzen huet dat fir den Tanktourismus zu Lëtzebuerg a wat bedeit dat fir d'Ëmwelt?

Agrikultur
Europäesch Agrarpolitik

Bis d'nächst Joer wëllt d'EU-Kommissioun hir Reformpläng fir d'Agrarpolitik no 2020 duerchbréngen. Hei si Budgetskierzunge virgesinn, anerersäits awer och méi Oploen a Saache Klima- an Ëmweltschutz.

Programm

Dossieren

  • Festival de Cannes 2019

    Alleguer d'Artikele vum Festival de Cannes 2019.

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen