Holocaust-Denkmal "Erënnerung ass d'Flicht vun all Natioun"

Um Boulevard Roosevelt an der Stad gouf en Denkmal fir d'Affer vun der Shoah ageweit. Dat a Presenz vun der Groussherzoglecher Koppel. D'Monument gëllt als Warnung virun der Barbarei, der Intoleranz an dem Rassismus. Am Mëttelpunkt vun de Riede stoung d'Wichtegkeet vun der Erënnerung.

Maxi Pesch / cbi

Erëffnung vum Shoa-Monument
D'Erëffnung vum Shoa-Monument / Foto: SIP

Fir d'Erënnerung wakereg ze hale gouf eng symbolesch Plaz erausgesicht. 41, Boulevard Roosevelt, direkt niewent der Kathedral. Et war do, wou déi éischt Synagog zu Lëtzebuerg opgeriicht gouf, erënnert d'Stater Buergermeeschtesch Lydie Polfer. Déi wier mam Ukomme vu Refugiéeë séier ze kleng gewiescht, zielt d'DP-Politikerin. Dofir wier eng nei, méi grouss Synagog gebraucht ginn, déi 1894 um Eck vun der Rue Notre Dame an der Rue Aldringen gebaut gouf. 1943 ass dës Synagog allerdéngs zerstéiert ginn.

Symbolesch ass virun allem och den Artist, deen dëst Monument geschafft huet. De franséisch-israelesche Sculpteur Shelomo Selinger ass 1928 gebuer an huet néng Konzentratiounslageren an zwee Doudesmärsch iwwerlieft. Seng dräi Meter héich Granit-Statu aus där Flamen a Käpp erauskommen, wier eng Warnung fir déi zukünfteg Generatioun.

Eng Warnung fir de Mënsch

Et wier e Privileeg fir de Shelomo Selinger, esou eng Skulptur ze maachen, déi wéinst hirer symbolescher Valeur och zur Schéinheet vun dëser Stad ka bäidroen. De Granit wier virun allem eng Warnung fir de Mënsch, an datt de Mënsch net soll de Feind vum Mënsch ginn. Fir hie wier et e grousse Privileeg, well als Laie kéint hien net fir déi Doudeg bieden, mee en hätt de Privileeg kritt, fir dat direkt an de Granit ze meesselen. Dorunner hätt hien zwee Joer geschafft, erzielt de Kënschtler.

D'Erënnerung ass eng Flicht fir all Natioun, esou d'Wieder vum Premier gëschter bei der Aweiung vum Monument. De Xavier Bettel huet sech stolz gewisen, datt d'Regierung sech an de leschte fënnef Joer vis-à-vis vun der jiddescher Communautéit entschëllegt hätt. Gläichzäiteg huet hie sech genéiert gewisen, datt et bis 2018 gedauert hätt, bis datt dat geschitt wier.

Et muss een immens vigilant sinn

De President vum Consistoire israélite de Luxembourg ass frou, datt no der offizieller Entschëllegung vun der Regierung elo och ee Monument un d'Leide vun de Judde während dem Zweete Weltkrich erënnert. Mee och haut géif den Antisemitismus nach vill Mënschen ëmbréngen, sot den Albert Aflalo. Datt de Populismus an den Nopeschlänner ëmmer méi klëmmt, géif näischt Guddes viraussoen. Den Antisemitismus hätt sech ëmmer nees nei erfonnt, an dofir misst een immens vigilant sinn.

Op der Stater Gare gouf ausserdeem nach eng Plack devoiléiert, déi un d'Deportatiounszich während dem Zweete Weltkrich viru genee 75 Joer erënnert. De Laurent Moyse, President vum Comité fir d'Undenken un den Zweete Weltkrich, appelléiert un d'Leit, sech dorunner ze erënneren, datt tëscht 1941 an 1943 genee 658 Männer, Fraen a Kanner vun der Stater Gare aus de Ghettoen an a Lageren deportéiert goufen. Do wiere si kalbliddeg vun den Nazien ëmbruecht ginn. D'Stater Gare wier eng Plaz fir unzekommen, eng Plaz fir fortzefueren, mee an dësem Moment wier se och eng Plaz fir ze gedenken.

An der Mediathéik:

Aktuelles / /
Lauschteren

Méi zum Thema

Denis Scuto Analys
Zäithistoriker

Haut geet d'Fussball-Weltmeeschterschaft a Russland un an e Sonndeg gëtt zu Lëtzebuerg en nationaalt Monument ageweit, dat un d'Affer vun der Shoah erënnert. Wat de Fussball mat der Shoah verbënnt, weist den Denis Scuto.

Sam Garbarski
Gespréich mam Sam Garbarski

"Es war einmal in Deutschland" beschäftegt sech mat Holocaust-Iwwerliewenden am Nokrichs-Däitschland. E Sujet, deen am Kino nach net wierklech thematiséiert gouf. Humor spillt am Film eng grouss Roll.

Programm

Dossieren

  • Affär Traversini/Dieschbourg

    De Roberto Traversini ass als Buergermeeschter an Deputéierten zeréckgetrueden. Hannergrond sinn Autorisatioune fir d'Aarbechten un engem Gaardenhaischen an d'Fro, ob hie bevirdeelegt ginn ass.

  • CinÉast 2019

    Et ass déi zwieleften Editioun vum CinÉast Filmfestival. Vum 3. bis den 20. Oktober ginn iwwer 65 Featuren a 50 Kuerzfilmer aus 20 Länner aus Mëttel- an Osteuropa gewisen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen