An der Elektrotechnik zum Beispill goufen zejoert zéng Plazen ausgeschriwwen, zwee Meeschter hate sech gemellt, an déi si wéinst de Sproochen net an de Stage opgeholl ginn.
Änlech gesäit et fir aner technesch Formatiounen aus. Déi aktuell Enseignante mussen dowéinst Iwwerstonne maachen, seet de Gerry Bethke President vun der AMET der Associatioun vun de Maîtres d'enseignement technique. Op Dauer wier et ustrengend fir bis zu 30 Stonnen d'Woch Schoul ze halen. "Et kann ee scho soen, datt d'Situatioun dramatesch ass."
Problematesch ass, datt et och am Handwierk ee Manktem u Meeschtere gëtt. Dacks hunn déi an der Privatwirtschaft entweder eng gutt Plaz, oder hu selwer ee Betrib opgebaut.
D'Karriär am Enseignement opwäerten
Den Enseignement mat der Obligatioun ee Stage an der Schoul ze maachen, ouni Garantie, deen zum Schluss ze packen, géif keng esou eng sécher Perspektiv ubidden.
Och a Punkto Karriäre fir Leit mat enger Meeschterprüfung misst een nobesseren, betount de Gerry Bethke:
"Fir d'Attraktivitéit vun onser Karriär an d'Luucht ze setzen, misst een déi aktuell Karriär B1 nei astufen an d'Karriär A2. Da kéint de Ministère domadder och Reklamm maachen."
D'Ministèrë misste méi Campagnë lancéiere fir Persoune mat enger Meeschterprüfung fir den Enseignement ze rekrutéieren, esou d'Fuerderung vun der AMET.
