Néng Méint hate sech d'Parlamentarier an der Spezialkommissioun PEST mat der Autorisatiounsprozedur vu Pestizide befaasst. Zil war et eng Situatioun wéi déi ronderëm den Herbizid Glyphosat an Zukunft ze evitéieren. Beim Produkt vu Monsanto war et jorelaang hin an hiergaangen, éier datt den ëmstriddene Planzekiller dunn awer Enn 2017 fir fënnef weider Joer zougelooss gouf.
Schwaarz-grénge Kompromëss
D'Auteure vum Rapport, den däitschen CDU-Politiker Norbert Lins an de Grénge Bart Staes haten à la Base ënnerschiddlech Positiounen. "Schwaarz-Gréng funktionéiert", fënnt de Norbert Lins en Vue vun deem Rapport. Et wier ee Kompromëss, mat deem hie liewe kéint, seet hien am 100,7-Interview.
D'Parlament gesäit seng Proposen als Basis fir eng Reform vun der EU-Prozedur fir Planzeschutzmëttelen ze autoriséieren. Allerdéngs gëtt esou eng Reform net explizit gefuerdert.
D'Prozedur misst méi transparent ginn, dat ass eng vun den Haaptdemandë vum Parlament. Déi Studien, déi an der Prozedur benotzt ginn, sollen ëffentlech zougänglech sinn an d'Prozedure missten harmoniséiert ginn. Donieft sollen an Zukunft d'Risikoanalyse fir geféierlech Substanzen net méi wéi bis elo vun den Hiersteller selwer gemaach ginn.
D'Parlament freet och Etüden iwwer déi laangfristeg Toxicitéit vu Wierkstoffer a Studien iwwer den Impakt op d'Gesondheet vum Mënsch vu Pestiziden.
Keng europäesch Prozedur
Zoustänneg fir d'Prozedure sinn den Ament national Autoritéiten. Bis elo kann eng Entreprise sech et selwer eraussichen, a wéi engem EU-Land si d'Demande fir d'Zouloossung vun engem neie Mëttel mécht.
Geet et dem Parlament no soll an Zukunft awer d'Europäesch Kommissioun decidéieren, wou d'Autorisatioun gemaach gëtt.
Déi Studien, déi an der Prozedur benotzt ginn, sollen ëffentlech zougänglech sinn an d'Prozedure mussen harmoniséiert ginn. Eng europäesch Prozedur gëtt awer net gefuerdert. Dat wier ze opwändeg, seet den Norbert Lins. D'EFSA, déi europäesch Agence fir Liewensmëttelsécherheet, hätt da missen Dausende vu Leit bäikréien. Amplaz eng Revolutioun ze maache wier et besser, op d'Evolutioun am Dossier ze setzen, sou den Norbert Lins.
D'Realitéit gesäit den Ament esou aus, datt ronn 80 Prozent vun den Autorisatiounen a just véier Länner, nämlech Däitschland, Frankräich, Groussbritannien an Holland ofgewéckelt ginn. De Brexit wäert hei also Konsequenzen hunn.
Glyphosat: Kontroverse bleiwen och am Parlament
Iwwer Glyphosat gouf vill gestridden an der Spezialkommissioun. Kee Wonner: d'Autorisatioun vun deem ëmstriddene Wierkstoff war jo iwwerhaapt d'Ursaach, firwat d'Kommissioun an d'Liewe geruff gouf. D'Zouloossung vum Herbizid gëtt awer net prinzipiell a Fro gestalt.
D'Kontroversen iwwer de Planzekiller goufen net opgehuewen, sot de Co-Auteur vum Rapport, de Bart Staes, e Méindeg am Debat am Parlament zu Stroossbuerg. Et gouf awer festgehalen, datt d'Etüden, déi sech domat befaassen, ob de Wierkstoff kriibserreegend ass, systematesch sollen iwwerpréift ginn. Dat en Vue vun den Diskussiounen, déi nees ufänken, wann d'Autorisatioun vum Glyphosat nees ausleeft.