Europawahlen 2019 Europa ka vill Formen hunn

An de Kichegespréicher komme jonk Politiker zu Wuert, déi fir hir Partei mat an d'Europawahle ginn. An der drëtter Editioun schwätzen de Joe Thein (déi Konservativ), d'Tessy Brisbois (ADR) an de Christopher Lilyblad (Volt) iwwer d'EU-Institutiounen.

Pit Walté / cz

Kichegespréicher 3
De Joe Thein (déi Konservativ), d'Tessy Brisbois (ADR) an de Christopher Lilyblad (Volt)

Volt, eng paneuropäesch Partei, setzt sech dofir an, datt d'Europaparlament eng eege Regierung wielt, also mat Ministere fir déi verschidde Beräicher. D'Parlament wier déi eenzeg europäesch Institutioun, déi de Bierger direkt wiele kéint, seet de Christopher Lilyblad, dowéinst sollt een dat da stäerken.

De Christopher Lilyblad vun der VOLT

De Joe Thein vun déi Konservativ ass géint esou eng europäesch Regierung. "Mat der paneuropäescher Iddi géife mir aus der der EU e Staat am Staat maachen", an dat wier net hir Iddi vun der EU. D'Partei vum 27 Järege gesäit de Modell vum Europa vun de souveränen Natiounen als de richtege Wee un. D'Länner sollen zwar nach zesummeschaffen, wichteg Kompetenze sollen awer nees vun de Memberstaaten decidéiert ginn. Donieft wéilt een de Verwaltungs-Apparat vun der Europäescher Unioun verklengeren a Personal ofbauen. Déi administrativ Struktur wier e rise Käschtepunkt, esou nach de Joe Thein. E Punkt, deen de Christopher Lilyblad awer net gëlle léisst. Wa Staate méi géifen zesummeschaffen, wier d'Méiglechkeet do, Synergien ze schafen an duerch méi staark Institutioune souguer Suen ze spueren.

D'ADR setzt sech op engem europäesche Plang och fir en Europa vun de Natiounen an. D'Gesondheetspolitik sollt op engem nationalen Niveau gereegelt ginn, esou d'Tessy Brisbois, do hätt all Land aner Besoinen, do dierft een net alles an een Dëppe geheien. Eng Friddenspolitik zum Beispill misst een awer zesummen ugoen.

Eng Fuerderung vun déi Konservativ ass, datt d'Schengen-Ofkommes soll nei verhandelt ginn, reegelméisseg a punktuell Kontrolle bannen der EU sollten erëm ageféiert ginn. Eng Fuerderung mat där déi aner zwee Parteien net averstane sinn. Fir Volt wiere Fräiheete wéi eng fräi Zirkulatioun fundamental, seet de Christopher Lilyblad, et sollt ee just e Sécherheets-Apparat installéieren, deen am Fall vun Abus kontrolléiert. Et sollt een an der EU zesummeschaffe fir d'Baussegrenzen ze schützen, fir esou d'Integritéit vum Schengeraum ze assuréieren. An och eng ADR wier fir sécher Baussegrenzen, d'fräi Zirkulatioun bannen der EU wier awer weiderhi wichteg, esou d'Tessy Brisbois.

De Joé Thein vun déi Konservativ

Fir Europa virunzebrénge setze sech Volt an déi Konservativ dofir an, datt d'EU-Parlament an Zukunft soll d'Méiglechkeet kréie Gesetzer ze proposéieren. Et wieren déi gewielte Mandatairen, an esou kéint een och nees d'Vertrauen an d'EU erhéijen. Och d'Tessy Brisbois fënnt, datt d'EU-Parlament d'Méiglechkeet kréie sollt Gesetzer ze proposéiere, betount awer, datt déi final Decisioun ëmmer nach bei de de Memberstaate léie sollt.

D'Tessy Brisbois vun der ADR

D'ADR an déi Konservativ schwätze sech géint eng europäesch Arméi aus. D'Recht op eng Arméi dierft nëmme bei engem Nationalstaat léien, seet de Joe Thein a fir d'Tessy Brisbois wier et éischter sënnvoll d'Zesummenaarbecht am Sécherheetsberäich tëschent de Länner ze intensivéieren. Fir de Christopher Lilyblad vu Volt gehéiert eng europäesch Arméi awer zu enger staarker Aussepolitik. Mat enger militärescher Capacitéit kéint ee besser fir europäesch Interête géigeniwwer Muechte wéi China, Russland oder den USA astoen.

Méi zum Thema

Kichegespréicher #2
Europawahlen 2019

An de Kichegespréicher komme jonk Politiker zu Wuert, déi fir hir Partei an d'Europawahle ginn. An der zweeter Editioun schwätzen d'Mara Martins (déi Lénk) an de Loris Meyer (DP) doriwwer, wéi een de Klimaschutz am beschten ugeet.

Kichegespéicher 1
Europawahlen 2019

An de Kichegspréicher komme jonk Politiker zu Wuert, déi mat an d'Europawahle ginn. D'Martine Kemp (CSV), de Christian Welter (Piratepartei) an d'Elise Nunes (KPL) schwätzen iwwer Ëmweltschutz.

Net verpassen

Dossieren

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun hire Bierger? Mir weise konkret Beispiller.

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen