Aussepolitik Europäesch Aussepolitik no Afghanistan

D'Aussepolitik vun den USA changéiert an dat huet och Konsequenze fir d'Verdeedegungspolitik vun der EU. Dat seet de Politolog Robert Harmsen vun der Uni Lëtzebuerg am 100,7-Interview. An der Ried vum US-President Joe Biden Ufanks der Woch iwwer den 20-järege Krich am Afghanistan hätt sech en neien Tenor bemierkbar gemaach: d'USA wier net méi bereet, wéi an der Vergaangenheet, militäresch Interventiounen ze ënnerhuelen.

Isabel Scott / cbi

Robert Harmsen
De Politolog Robert Harmsen. Foto: Archiv

Lauschteren


Den US-President Joe Biden fiert net méi d'Schinn vum viregte President Donald Trump, an Europa ass frou driwwer: D'USA wéilten zeréck an déi international Arena an hir traditionell Allianze stäerken, notamment den Nord Atlanteschen Traité.

Dat wier eng zentral Charakteristik vun der "Joe-Biden-Doktrinn" an der Aussepolitik, mengt de Politolog Robert Harmsen. Hie versteet dat als "America's back", mee et misst een d'Bedingunge vun dësem Engagement verstoen: et géif hei virop ëm déi amerikanesch Interessie goen.

Amerikanesch an europäesch Interessien

Déi geopolitesch Interête vun den USA géife sech net zu 100 Prozent mat den europäeschen Interessien iwwerschneiden, mengt de Robert Harmsen. Den Joe Biden huet a senger Afghanistan-Ried op d'Rivalitéit mat China an Tensioune mat Russland higewisen.

Ressourcenintensiv militäresch Interventiounen, wéi notamment am Afghanistan, wieren haut, anescht wéi nach virun 20 Joer, net méi vu strategescher Wichtegkeet, esou d'Aschätzung vum Robert Harmsen.

Et hätt een d'Gefill, datt dat "einfach net funktionéiert", well militäresch Interventioune mat onproportional héije Käschte verbonne wieren. Dës Ressourcë kéint een enzwousch anescht besser asetzen.

Eng autonom europäesch Aussepolitik

Den Asaz am Afghanistan schéngt dee Wëllen ze stäerken: Afghanistan hätt der EU hir grouss militäresch Ofhängegkeet géigeniwwer den USA gewisen, sot de Verdeedegungsminister François Bausch am 100,7-Interview. De Robert Harmsen ass där selwechter Meenung: d'Fro vun der europäescher Souveränitéit an d'Fäegkeet, sech selwer verdeedegen ze kënnen, wäert erëm opkommen.

An Europa ass dës Fro awer ëmstridden, preziséiert de Robert Harmsen: déi meescht Länner wéilten heifir keng Suen ausginn. Eng reell strategesch Autonomie wier nämlech mat héije Käschte verbonnen. D'EU-Memberlänner wieren heira gespléckt: verschiddener géife sech eng méi staark europäesch Aussepolitik wënschen, wärend anerer iwwerzeegt Atlantiker wieren.

Den Joe Biden wier gewëllt déi Transatlantesch Liene mat Europa ze stäerken, mee de chaotesche Réckzuch aus dem Afghanistan ouni Récksprooch mat NATO hätt bei den Europäer, besonnesch Groussbritannien, e batteren Nogoût hannerlooss, esou d'Vue vum Robert Harmsen.

Méi zum Thema

François Bausch
EU

An der EU kënnt d'Diskussioun iwwert eng eegen, europäesch Interventiounstrupp nees un d'Rullen. D'Afghanistan-Kris hätt gewisen, wéi schwaach d'EU bei esou Operatiounen op der Broscht ass, sou de François Bausch.

Charles Goerens
No Victoire vun Taliban

De Charel Goerens hält et weiderhi fir richteg, datt Lëtzebuerg sech um NATO-Asaz am Afghanistan bedeelegt huet. Et wier "äussert bedauerlech", datt d'Taliban elo erëm d'Muecht u sech gerappt hunn.

 

Net verpassen

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen