EU-Energieministeren Europäesch Ziler fir Stroum ze spueren
Ziler fir Elektrescht anzespueren an een Deckel um Revenue vu bestëmmte Stroumproduzenten: iwwer déi Mesurë si sech d'Energieministeren aus de 27 EU-Länner eens ginn. D'Diskussiounen iwwer een Deckel um Gaspräis hunn iwwerdeems gewisen, datt d'Meenungen ënner de Länner weider auserneeginn.
De Lëtzebuerger Energieminister begréisst den Accord. D'Anzéie vun extra Revenue vu bestëmmten Energieentreprise bréngt vill Suen eran.
Zu Lëtzebuerg ass d'Zuel vun de Stroumproduzenten, bei deene sech de Staat zerwéiere kann, awer zimmlech limitéiert, sou de Claude Turmes. Hie schwätzt vun "e puer Wandmillen an e puer grouss Solaranlagen", dat géif enger zweestelleger Milliounenzomm entspriechen, déi de Lëtzebuerger Staat géife rakréien.
Mindestens 5 Prozent manner Stroumverbrauch a Spëtzenzäiten
Derbäi kéime Suen, déi Däitschland vun hire Stroumproduzenten anzitt - an déi da Lëtzebuerg, wouhi vill Stroum exportéiert gëtt, géifen zoustoen. Detailer doriwwer mussen awer nach ausgehandelt ginn.
Et ass ee sech eens ginn, datt d'Länner fräiwëlleg de Stroumverbrauch ëm 10 Prozent reduzéieren - obligatoresch ass en Zil vu fënnef Prozent manner Konsum an de Spëtzenzäiten.
Hei misst een, sou de Claude Turmes, bei de groussen Netzbedreiwer, déi Lëtzebuerg beliwweren, usetzen a sech mat hinnen un een Dësch setzen.
Däitschland huet en Hëllefsprogramm vun 200 Milliarden Euro op de Wee bruecht, fir déi héich Präisser opzefänken. Lëtzebuerg ass och prett, déif an d'Täsch ze gräifen.
Anerer wäerten nozéien, souwäit si sech dat leeschte kënnen. Laangfristeg ass dat awer net duerchzehalen, gëtt de Claude Turmes zou:
"Dat ass eng Course, déi do am Gaangen ass, fir een deen aneren ze iwwerbidden. Déi muss ophalen, dat hale mer net duerch."
Präisdeckel fir de Gas: Net vum Dësch
De Sujet vun engem Deckel um Gaspräis ass net vum Dësch, et géif ee viru fueren. Ënner anerem d'Belsch huet annoncéiert, weider doru festzehalen.
D'Europäesch Kommissioun wëllt nach virum EU-Sommet déi nächst Woch zu Prag eng konkret Propos op den Dësch leeën, a spéitstens da gëtt virun doriwwer diskutéiert.
Méi zum Thema
Wéi an der EU Stroum gespuert soll ginn
Iwwerall an der EU hunn d'Regierunge Spuerpläng ausgeschafft. Manner hëtzen an d'Luuchten ausmaachen, gehéiert dacks zu de proposéierte Mesuren. Et gëtt awer duerchaus Nuancen an ënnerschiddlech Iddien.
Stad Lëtzebuerg: Energiespuermesurë goufe presentéiert
Eng Reduktioun vun der Temperatur an de Gebaier a manner Beliichtung. Mat dëse Mesurë wëllt d'Stad Lëtzebuerg bis Mäerz nächst Joer 15 Prozent Energie spueren, sou wéi d'Regierung et fuerdert.
