D'Assemblée parlementaire vum Europarot ass direkt vun engem Korruptiounsskandal an Zesummenhang mam Aserbaidjan betraff. Een internationale Konsortium vu Journalisten huet dëser Deeg ee Blanchimentsreseau opgedeckt, dee wéinstens emol iwwert eng dänesch Bank a fiktiv Londoner Gesellschafte gelaf ass. Iwwert dee Wee si Suen aus dem Aserbaidjan un aflossräich europäesch Politiker gefloss, déi matgehollef hunn, Kritik un der aserbaidjanescher Regierung wéinst Verstéiss géint d'Mënscherechter kleng ze halen.
Onofhängeg Enquêteuren ënnersichen de Moment, wéi den Aserbaidjan Deputéiert vun der Assemblée vum Europarot zu senge Gonschte beaflosst huet. Ënnert anerem am Viséier: Den italienesche Politiker a fréiere Fraktiounschef vun der europäescher Vollekspartei Luca Volontè.
Zwee An zou
"Et gëtt héich Zäit, datt dee Schwier opgepickt gëtt", seet déi liberal Deputéiert Anne Brasseur. Si huet d'Assemblée parlementaire vun 2014 bis d'lescht Joer presidéiert, an ass an zwee Gremien aktiv, déi sech mat deene Froe beschäftegen. Et géif scho laang Rumeure ginn, datt eng ganz Rei Membere vun der Assemblée parlementaire vum Europarot dem Aserbaidjan méi wéi favorabel gesënnt wieren, an déi zwee Aen zou maachen.
Déi fréier Sowjet-Republik Aserbaidjan ass bekannt fir hir riseg Pëtrol- a Gas-Ressourcen. Gläichzäiteg gëtt den autoritäre Regime vum aserbaidjanesche President Ilham Aliyev zënter Joren international kritiséiert, wéinst massive Verstéiss géint d'Mënscherechter. Membere vun ONGen a Journaliste sinn agespaart ginn, well si d'Korruptioun an hirem Land denoncéiert hunn.
"An nawell sinn eng Partie Parlementairen, déi déi verteidegen", seet d'Anne Brasseur. "Da muss ee sech froe firwat. An elo wësse mir, datt Sue gefloss sinn."
Ënnert anerem un den däitschen CSU-Politiker a fréiere Parlamentsmember Eduard Lintner. Den deemolege President vun der EVP Luca Volontè hätt sengersäits 2,3 Millioune vun den Aserbaidjane kritt, seet d'Anne Brasseur. Dat hätt eng Enquête vum Parquet vu Mailand erginn.
Rapport iwwerraschenderweis ofgelehnt
Den 23. Januar 2013 gouf ee Rapport, deen d'Situatioun vun de politesche Prisonéier am Aserbaidjan denoncéiert hat, iwwerraschenderweis vun enger Majoritéit an der Assemblée vum Europarot ofgelehnt. Zwee Lëtzebuerger waren deemools um Vote bedeelegt, alle béid hate se fir de Rapport gestëmmt. Den CSV-Deputéierte Norbert Haupert war a senger Fraktioun minoritär. Op eis Nofro hi kéint hie sech net méi un d'Ëmstänn vun deem Vote erënneren.
Anescht d'DP-Deputéiert Anne Brasseur. Bei där Ofstëmmung wieren op eemol ganz vill Leit present gewiescht. "Do ware Leit am Sall, déi zwar Member sinn, mä déi ee soss ni gesinn huet. Dat dierft jo awer wuel keen Zoufall gewiescht sinn."
Praktesch all d'Fraktioune waren deemools bei der Fro vun de politesche Prisonéier am Aserbaidjan gedeelt. Als Presidentin vum liberale Grupp hätt si gesot, et misst ee fir de Rapport stëmmen, seet d'Anne Brasseur. "Ech hunn awer ganz gutt gespiert, datt och a mengem Grupp Leit influenzéiert gi sinn."
Ënnert den Deputéierten, déi deemools géint de Rapport gestëmmt haten, war de spuenesche Konservative Pedro Agramunt, aktuelle President vun der Assemblée an Nofolger vum Anne Brasseur op deem Posten. "Dee wollt souguer verhënneren, datt eng Enquête géif gemaach ginn."
Wéinst enger rezenter Rees beim syresche President Bashar al Assad huet de Pedro Agramunt d'Vertraue vu villen Deputéierten entzu kritt. Well hie sech weigert ze demissionéieren, kéint de Spuenier Ugangs Oktober mat engem Vote an der Plenière vu sengem Presidente-Posten enthuewe ginn.