Deier Energie FEDIL-Energie-Expert: Héich Energiepräisser "kee kuerzfristege Phenomeen"
"Dat wat Angscht mécht ass, datt dat hei kee kuerzfristege Phenomeen ass", esou de Gaston Trauffler vun der FEDIL iwwert den Impakt vun den héijen Energiepräisser op déi Lëtzebuerger Industriebetriber. Et geséich net esou aus, wéi wann d'Präisser laangfristeg erëm géifen erof goen. Bei engem aktuelle Kontrakt fir 2024 beliwwert ze ginn, wier de Präis fir Gas a Stroum méi wéi duebel esou héich wéi virun der Energiekris. Dëst wiere Méikäschten, déi d'Entreprisë laangfristeg net einfach kéinten absorbéieren, warnt de Responsabele fir d'Industriepolitik bei der FEDIL am 100,7-Interview.
Wéi staark déi Lëtzebuerger Industrie-Betriber ënnert den héije Gas- a Stroumpräisser leiden, hänkt vun hiren Akafsstrategien of, esou den Expert vun der FEDIL. Wann eng Entreprise hir Energie kuerzfristeg akeeft, da géif si den Impakt voll spieren. Vu Januar bis Mëtt Februar 2022 louchen d'Elektreschpräisser duerchschnëttlech bei ëm déi 160 Euro d'Megawattstonn; dat wier véier mol méi héich wéi d'Budgeten déi d'Betriber fir Energie virgesinn hätten.
"Dat heescht duerch kuerzfristeg Optimisatiounsmoossname ka kee Betrib déi Präishaussen absorbéieren a laangfristeg hält e Betrib dat nëmme ganz ganz schwéier aus."
Néirens wieren d'Energiepräisser méi staark geklomme wéi an Europa, stellt de Gaston Trauffler vun der FEDIL fest. Dowéinst wier d'Situatioun besonnesch schlëmm fir déi Lëtzebuerger Entreprisen, déi sech géint aussereuropäesch Konkurrente musse behaapten. Dorënner wieren zum Beispill Automobilzouliwwerer zu Lëtzebuerg, déi déi Präisser net kënne viru ginn, mee selwer mussen absorbéieren. Déi Firme géifen awer ënner anerem Produite wéi Glas, Stol, Aluminium a Koffer verschaffen, wat immens energieintensiv wier.
Bei mëttelstännegen Entreprisen, géifen et der ginn, déi Méikäschte vun Honnertdausenden Euro hunn. Bei méi Energieintensive Betriber wier et nach méi, deelweis géifen d'Käschten a Milliounenhéicht leien.
Méi zum Thema
Héich Energiepräisser: Wéi soll d'Kaafkraaft vun de Stéit erhale ginn?
Allgemeng war ee sech gëschter an der Chamber eens driwwer, datt de Staat soll déi zousätzlech TVA-Recetten, déi wéinst der Hausse vun den Energiepräisser entstinn, nees zeréck un d'Stéit ginn.
EU-Klimapak ënner Drock
D'Diskussioun iwwer ee Pak vu Klimaschutz-Mesuren, déi d'EU-Kommissioun am Juli presentéiert hat, fänkt eréischt un. Wéinst der Hausse vun den Energiepräisser riskéiert se elo zimmlech hëtzeg ze ginn.
