Invité vum Dag FEDIL: "Et muss iwwer eng Upassung vum Index geschwat ginn"
Den Direkter vun der Industriellefederatioun FEDIL warnt, et misst een oppassen, datt d'Lounerhéijungen duerch den Index an de nächste Méint net zu "perversen Effekter" féiert.
Et misst ee verhënneren, datt nieft den héijen Energiepräisser och nach d'Lounkäschte fir d'Betriber explodéieren, esou de René Winkin am 100,7-Interview.
"Mir mussen och evitéieren, datt mer ee Rhythmus vu Lounkäschte kréien, deen herno dozou féiert, datt nieft enger Präisexplosioun bei verschidde Matière premièren an Energie, och nach eng Präisexplosioun bei de Servicer kënnt."
De FEDIL-Direkter betount hie wéilt den Indexsystem u sech net a Fro stellen. Hien ass awer der Meenung, datt een net dolaanscht kënnt de Mechanismus un déi aktuell Situatioun "unzepassen".
"Et dierf een net vun dem Moment profitéiere fir ze soen: Mir stellen den Index en tant que tel oder mir wëllen en defiguréieren. Well da wësse mer, datt zu Lëtzebuerg weder d'Politik nach d'Sozialpartner bereet wieren an eng Diskussioun ze goen. Ech mengen, datt een awer muss eng Diskussioun féieren, déi der Situatioun gerecht gëtt."
Et wier nach ze fréi fir ze soen, wéi esou eng Upassung kéint ausgesinn, esou de René Winkin. Déi Diskussioun misst d'Regierung zesumme mat de Sozialpartner féieren.
An der Mediathéik:
LauschterenMéi zum Thema
Claude Turmes: "Versuergung beim Pëtrol, Gas a Stroum ass assuréiert"
Russesch Gasimporter solle bannent engem Joer ëm zwee Drëttel reduzéiert ginn, esou gesäit et ee Plang vun der EU-Kommissioun vir. "Dat ass e realistescht Zil", seet den Energieminister Claude Turmes.
"Eng dramatesch Situatioun fir de Secteur"
De Romain Hoffmann, President vum Groupement pétrolier, stellt fest, datt een nach ni esou héich Sprit-Präisser gehat hätt. Dëst géif de Moment och op d'Käschte vum Secteur goen.
