Covid-Tester Feelerquot läit bei bis zu 20 Prozent
Ee positive Corona-Test, deen duerch en Ofstréch am Hals oder an der Nues gemaach gouf, misst net nach eng Kéier kontrolléiert ginn, schreift d'Gesondheetsministerin Paulette Lenert. D'Spezifizitéit bei esou Tester géif bei 99 bis 100 Prozent leien.
Bei negativen Tester ass et manner sécher, well do och d'Sensibilitéit eng wichteg Roll spillt. An déi hänkt vu ville Facteuren of, zum Beispill d'Qualitéit vum Ofstréch an de Moment vum Ofstréch par rapport zu der Infektioun, äntwert d'Paulette Lenert op eng parlamentaresch Fro vun der CSV.
Bei negativen Test-Resultater géif een dofir dervun ausgoen, datt bis zu 20 Prozent vun dene Resultater "falsch negativ" kënne sinn, an also bestoend Infektioune kéinte verpassen. D'Paulette Lenert seet awer: wann eng Persoun negativ getest gouf, an awer Covid-19 Symptomer huet, dat gëtt geroden, den Test ze widderhuelen.
Méi zum Thema
D'Aarbecht an de Laboratoiren
D'Nofro u medezineschem Tester-Material ass drastesch an d'Luucht gaangen. Dozou gehéieren d'Stäbercher, d'Reagenzproduiten an d'Maschinne fir d'Tester auszewäerten. Och d'Personal ass ënner Drock.
Lëtzebuerg ka virun am grousse Stil op de Coronavirus testen
De Staat kann déi weider Phas vun der Testcampagne, vun Enn August bis Enn Mäerz d'nächst Joer, mat ronn 60 Milliounen Euro finanzéieren. D'Gesetz dofir gouf den Dënschdeg eestëmmeg an der Chamber gestëmmt.
