Et geet ëm eng Email, déi aus dem Finanzministère un e Geschäftsaffekot geschéckt gouf: An der Mail, déi eis virläit, kritt den Affekot gesot, et wier besser, hie géif net an der Enquêtëkommissioun iwwer d'Panama Papers aussoen.
De Finanzminister seet hie wär net iwwer dësen Echange informéiert gewiescht. No enger interner "Recherche" hätt sech awer erausgestallt, datt een Affekot beim Ministère nogefrot huet, op en un der Enquêtëkommissioun soll deelhuelen oder net. Dësen Affekot, deen de Minister net wëllt nennen, hätt de Lëtzebuerger Staat als Client "bei ganz villen Affären, déi mat Fiskalitéit ze dinn hunn".
Keng allgemeng Recommandatioun
Den zoustännege Fonctionnaire hätt eng "relativ technesch Äntwert" ginn, an drop higewisen et wier "vläicht besser" den Affekot géif net an d'Kommissioun goen. De Pierre Gramegna weist drop hin, et géif sech hei em eng "speziell Situatioun" handelen, tëscht engem Affekot a sengem Client, dem Staat. D'Recommandatioun vum Fonctionnaire wier dofir net als allgemeng Recommandatioun vum Ministère ze verstoen.
De Finanzminister seet, hie selwer géif d'Recommandatioun aus der Mail haut net méi esou widderhuelen. Wann den Affekot sech nach eng Kéier géif ëmfroen, da géif hien him soen datt hie "genau weess, wat seng Obligatiounen, seng Contrainten a seng Rechter sinn", an datt hien de Staat net bräicht ze froen, fir dat z'interpretéieren, sou de Pierre Gramegna.
Oppositioun just deelweis zefridden
D'Oppositioun gëtt sech nëmmen zum Deel mat den Erklärungen vum Minister zefridden. Den CSV-Deputéierte Gilles Roth seet, seng Partei hätt Kloerheet gefrot, an och Kloerheet kritt. Et wier awer "onglécklech, datt de Minister net weess wat a sengem Ministère geschitt", an datt doduerch inhaltlech Mailen an engem sensibelen Dossier un d'Press ginn.
D'ADR da gesäit d'Verantwortung net beim Finanzminister. De Skandal wier an dësem Fall, datt e confidentielle Pabeier tëscht engem Affekot a sengem Client un d'Ëffentlechkeet komm wier, esou den den ADR-Deputéierte Roy Reding.
Den David Wagner vun Déi Lénk gleeft iwwerdeems net drun, datt den zoustännegen Fonctionnaire ganz op eege Fauscht gehandelt huet. Hie géif dovun ausgoen, datt de Mail vun engem "héiere Beamten" verschéckt gouf, deen den Dossier inhaltlech suivéiert, a weess, wéi eng Bedeitung d'Mail huet, déi hie verschéckt huet. Et géif deemno net den Androck vermëttelen, wei wann d'Regierung a Steierfroe wierklech wéilt fir Transparenz suergen, sou den David Wagner.