Hëllef aus Lëtzebuerg Fir déi néngte Kéier mat humanitärer Hëllef an d'Ukrain
D'Ukrain brauch weider humanitär Hëllef, an all kleng Quantitéit u Material oder u Sue muss an d'Land bruecht ginn, heiansdo mat eegener Hand. Dat duecht sech och de Borys Bilan, wéi déi russesch Invasioun vun der Ukrain viru knapps engem Joer ugefaangen huet. Mam Minibus ass hien op déi polnesch Grenz gefuer, huet Donen ofginn a Flüchtlinge mat op Lëtzebuerg bruecht. Dës Kéier huet hie keng Leit um Réckwee mat dobäi, mee Hëllef brauch d'Land trotzdeem.
Dës Woch ass dee 44-Joer-ale polnesche Mann aus Lëtzebuerg fir déi néngte Kéier aus der Regioun zeréckkomm. Ziviliste solle vun dëser Hëllef profitéieren. Virun Allem Kanner an eeler Leit.
"Fir mech sinn dat déi Leit, déi d'Hëllef am meeschte brauchen. Mir fuere bei e Kolleeg hei zu Kiew. Hien hëlleft mir des Donen ze distribuéieren. Dat kennt alles vu menger Arméi vun Engelen, déi ech an deene leschten zwielef Méint zesummegestallt hunn."
De Borys Bilan huet eng Email-Lescht vun 110 Leit, déi him Done ginn. Des Kéier sinn et 7.000 Euro, déi hien a just véier Deeg gesammelt huet.
"Et trefft eis all direkt an Europa"
Houfreg nennt hie se 'Missiounen', déi laang Reesen, déi de Borys Bilan elo schonn néng Mol gemaach huet. Um Ufank un déi polnesch Grenz, an elo bis eran an d'Ukrain. An dës Woch bis an d'Haaptstad Kiew.
D'Sue ginn zum Beispill un en Dëschtennis-Club zu Kiew, fir den Training vu Kanner aus der Krichszon ze finanzéieren. Aner Done gi vu Fräiwëllegen an d'Géigend vu Bakhmut bruecht, do wou déi schlëmmst Kämpf sinn, a wou d'Leit Iessen a Medikamenter brauchen.
Et ass evident, datt ee Mann, deen elo schonn néng Mol seng Famill doheem gelooss huet fir de Wee an des Géigend ze maachen, ganz déif vum Krich betraff ass.
"Ech hunn d'Gefill, datt dëst net ee Konflikt tëscht Russland an der Ukrain ass. Et trefft eis all direkt an Europa. Dofir spieren ech elo vill méi Haass a Roserei ewéi virdrun. Well ech gesinn, wéi no et ass wat hei geschitt. Ech gesinn, datt onschëlleg Leit dru leiden. Dat huet en Afloss op mäi Liewen."
Käerzen a Medikamenter
Mat am Minibus sinn och Käerze fir an d'Tranchéen op der Front, fir Luucht a Wäermt am Kampf mat de Russen, a Medikamenter. Saachen, déi hien zu Berlin kritt huet, vun engem anere Privatmann, deen och reegelméisseg Hëllef an d'Ukrain bréngt.
Den Andriy kritt déi Saachen. Een Zaldot an der Elite-Unitéit 'Kraken', déi un der Front kämpft.
"Ech sinn immens dankbar fir d'Hëllef vu Leit aus ville Länner, déi der Ukrain hëllefe wëllen. Ouni déi Hëllef wier et ganz schwéier géint d'Russen ze kämpfen."
No der Rees vun zwee Deeg zeréck op Lëtzebuerg schreift de Borys Bilan e Rapport fir d'Leit déi Done gemaach hunn. Dat Ganzt mat Fotoen, datt si och wëssen, datt hier Hëllef gutt an der Ukrain ukomm ass.
An der Mediathéik:
LauschterenMéi zum Thema
Däitsch Expertin: "Kampffligere fir d'Ukrain si sënnvoll"
Den ukrainesche President fuerdert, datt de Westen och Kampffligeren zur Verfügung stellt. Geet dat net ze wäit? De Rick Mertens huet bei enger däitscher Sécherheetsexpertin nogefrot.
Wéi wunnt eng ukrainesch Famill bei hirer Acceuilsfamill?
Zanter dem Ufank vum Krich an der Ukrain sinn iwwer 5.000 Ukrainer op Lëtzebuerg komm. Dorënner och d'Sasha mat hiren dräi Kanner an hirer Niess, déi zanter Mee bei Lëtzebuerger doheem wunnen.
