Aartevillfalt Géint d'Aartestierwe virgoen

Eng Millioun Planzen- an Déierenaarte sti virum Ausstierwen. Vill dovunner an den nächste Joerzéngten. Do virdru warnt de Weltbiodiversitéitsrot vun der UNO an engem Rapport. De Rapport soll bei de Verhandlungen ëm en UN-Ofkommes fir de Schutz vun der Biodiversitéit als Grondlag déngen. Dëst Ofkommes kéint dann am Oktober 2020 op der Weltnaturschutzkonferenz zu Kun-ming a China beschloss ginn.

Stephan Polet / cbi

Carole Dieschbourg
D'Ëmweltministesch Carole Dieschbourg. Foto: Archiv

De Weltbiodiversitéitsrot huet fënnef Haaptursaache genannt, déi d'Aartevillfalt weltwäit bedrohen. Dat sinn

  • déi verännert Aart a Weis, wéi d'Mënsche Land- a Mieresfläch benotzen,
  • ze vill direkt Exploitatioun vun Organismen, zum Beispill duerch Iwwerfëschen, Juegd an d'Fälle vum Bësch,
  • de Klimawandel,
  • Ëmweltverschmotzung
  • friem invasiv Aarten, déi heemesch Déieren- a Planzenaarte verdrängen.

Och zu Lëtzebuerg een Thema

Hei am Land gesäit déi lëtzebuergesch Ëmweltministesch Carole Dieschbourg virun allem zwou Ursaachen, déi en Drock op d'Biodiversitéit ausüben:

"Hei zu Lëtzebuerg ass et esou, datt deen Trend och besteet. Doduerch, datt mir e ganz grousse Siedlungsdrock hunn. Mir versigele ganz vill. Mir zerschneiden. Mir sinn an Europa dat Land, wat am meeschten zerschnidden ass. Mir hunn net vill zesummenhängend Landschaften."

E weidere Grond géif bei der Landwirtschaft leien, seet d'Carole Dieschbourg: et géifen ëmmer manner Strukturelementer an de Zone vertë sinn. An de leschte Joerzéngte wieren et ganz vill eenzel Beem, Hecken oder Blühsträifen net méi ginn.

Konkret géint Aartestierwe virgoen

Am Rapport vum Weltbiodiversitéitsrot ruffen d'Fuerscher Politiker weltwäit dozou op, méi déifgräifend Mesurë géingt d'Verschwanne vun Aarten ze ergräifen. Dat wier e wichtege Message, esou d'Ëmweltministesch Carole Dieschbourg.

Hei am Land wieren awer scho Mesuren ergraff gi fir d'Biodiversitéit ze schützen, beispillsweis beim Plange vu grousse Stroosseninfrastrukturen, wou ee probéiert hätt d'Vernetzung vun de Liewensraim duerch Wëldbrécken erëm hierzestellen.

De Gemengen an der Landwirtschaft hëllefen

Och géif een d'Gemenge beim Ausschaffe vu PAGe beroden an hinne soen, wou et besser wier, de Buedem net ze versigelen. Iwwer 17 Prozent vum Land wier Natura 2000-Reseau. Dëst wier kee Schutzgebitt u sech, "mee et ass e Gebitt, wou mir eis gemeinsam Ziler ginn: keng Verschlechterung vun der Biodiversitéit"; esou d'Carole Dieschbourg.

Bei der Landwirtschaft géif ee mat Primmen en Ureiz schafe fir Bongerten a Strukturelementer wéi Beem an Hecken ze erhalen.

Der grénger Ëmweltministesch Carole Dieschbourg no wier et wichteg ze gesinn, datt d'Interête vun der Landwirtschaft an de Naturschutz laangfristeg net an engem Widdersproch stinn. Den Ekosystem géif eis alleguerten um Liewen halen a wann et ëmmer manner Bestëbserinsekte géife ginn "dann ass eis Liewensqualitéit a Gefor", esou d'Carole Dieschbourg.

An der Mediathéik:

Aktuelles / / Stephan Polet
Lauschteren

Méi zum Thema

Eric Schauls
Biodiversitéit

Well d'Biodiversitéit weltwäit géif ofhuelen, wieren d'Liewensgrondlagen a Gefor. D'Zil dierft et engem UN-Rapport no allerdéngs net sinn, fir Ekonomie géint Biodiversitéit auszespillen, seet den Eric Schauls.

Roby Biwer
Natur & Ëmwelt

Suen an international Politik hätten de Naturschutz an den Hannergrond geréckelt, seet de President vun der Asbl Natur an Ëmwelt. De Roby Biwer warnt virun Aartestierwen.

Programm

Net verpassen

Dossieren

  • Berlinale 2020

    D'Berlinale feiert dëst Joer hire 70. Gebuertsdag ënner den neien Direktere Carlo Chatrian a Mariette Rissenbeek. D'Sarah Peppin an den Tom Dockal si fir eis op der Plaz.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun hire Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen