Educatioun Hausaufgabenhëllef: Surveillance oder Entlaaschtung?
Vun der Rentrée u solle Kanner an de Maison-relaisen Hausaufgabenhëllef ugebuede kréien. D'Martine Hansen kritiséiert, dat wier just eng Surveillance.
D'Martine Hansen mengt, datt déi geplangt Hausaufgabenhëllef net preparéiert wier. Den Educatiounsminister Claude Meisch géif sech elo eréischt Gedanken ëm déi néideg Formatioune fir d'Léierpersonal maachen - ze spéit fir d'CSV.
D'Reaktioun vun der Martine Hansen
D'Hausaufgabenhëllef wier iwwer de Knéi gebrach, och de Rôle vun den Educateure wier net kloer definéiert.
"Fir mech ass d'Kuerzfaassung Schaumschléierei, dat ass keng Hëllef, mee dat ass eng Surveillance."
D'Martine Hansen bezweiwelt, datt domat deene Kanner gehollef ass, déi doheem keng Hëllef kréie kënnen.
Gilles Baum: Kanner an Elteren entlaaschten
De Gilles Baum, Deputéierte vun der DP, widdersprécht: d'Kanner géife léieren, selbststänneg hir Hausaufgaben ze maachen. D'Kanner kéinten d'Educateure fir Hëllef froen, wa se eppes net verstanen hunn, mee d'Hausaufgabe géifen net verbessert ginn.
D'Reaktioun vum Gilles Baum lauschteren
Fir de Fraktiounschef vun der DP geet et och drëms d'Elteren ze entlaaschten, sou datt déi och Zäit hu sech ëm hir Kanner ze këmmeren "an net nach owes spéit mussen Hausaufgabe maachen".
Méi zum Thema
Claude Meisch: Detailer zu Ukënnegungen am Etat de la nation
Gratis Iessen an de Kantinnen, gratis Maison relaisen an Eltereforen: de Staatsminister Xavier Bettel huet nei Mesuren an der Schoul annoncéiert. Den Educatiounsminister Claude Meisch huet dem radio 100,7 Detailer dozou ginn.
