Maison Relais Inclusioun vu Kanner mat spezifesche Besoinen
D'Maison Relaise solle méi Kanner mat spezifesche Besoinen ophuelen. Den Educatiounsministère an d'Associatioun vun Eltere vu geeschteg behënnerte Kanner, APEMH, fuerderen eng inklusiv Approche an alle Betreiungsstrukturen. Zu Beetebuerg soll am Hierscht eng nei inklusiv Maison Relais fir 80 Kanner opgoen.
E Véierels vun de Plazen an där neier inklusiver Maison Relais zu Beetebuerg ass fir Kanner mat spezifesche Besoine virgesinn. D'Associatioun vun Eltere vu geeschteg behënnerte Kanner, APEMH, soll d'Gestioun iwwerhuelen. Et ass e gemeinsame Projet vum Educatiounsministère, der Gemeng Beetebuerg an der APEMH. An Zukunft sollen awer net just e puer spezialiséiert Strukturen, mä all d'Maison Relaise Kanner mat spezifesche Besoinen ophuelen, esou de Wonsch vun der APEMH an dem Educatiounsministère.
Wéi vill Kanner?
Zu Beetebuerg ass eng Quote vu 25% fir Kanner mat enger Behënnerung virgesinn. An der inklusiver Maison Relais zu Nidderkuer, déi et do schonn e puer Joer gëtt, gëllt déiselwecht Quote. Dat wier ze héich, seet d'Peggy Becker vun der APEMH. Den Undeel vu Leit mat enger Behënnerung an der Populatioun léich nämlech ënner 25%.
Fir APEMH géif en Undeel vun 10% fir Kanner mat spezifesche Besoinen deem entspriechen, wat een an der Populatioun begéint. Déi Quote vun 10% misst an all Maison Relais zu Lëtzebuerg ageféiert ginn, seet d'Peggy Becker. "Do wiere mer da ganz no un der Inclusioun".
Inklusiv Approche
Den Educatiounsministère léisst d'Fro vun de Quoten op. De Ministère hätt zwar kee Problem mat 25%, wéi se zu Nidderkuer existéieren an zu Beetebuerg geplangt sinn, seet d'Christiane Meyer vum Service Educatioun et Accueil.
D'Prioritéit fir de Ministère wier awer net d'Definitioun vu Quoten, mä d'Fërdere vun enger inklusiver Approche an alle Maisons Relaisen hei am Land.
Subventiounen
Déi zousätzlech staatlech Hëllefe fir Betreiungsstrukturen, déi Kanner mat spezifesche Besoinen ophuelen, ginn neierdéngs net méi pro Kand ausgerechent. Am neie System géif déi ganz Struktur an Equippe matabezu ginn, esou d'Christiane Meyer. "Et ass eng Decisioun vun enger Equipe, op si sech opmaache wëll fir Diversitéit. Wa jo, ginn déi zousätzlech Ressourcen un d'Equipe, an net méi pro Kand berechent", esou nach d'Christiane Meyer vum Service Educatioun an Accueil vum Educatiounsministère.
Duerch dat neit Jugendgesetz, wat zejoert ugeholl gouf, an de sougenannte "Bildungsrahmenplan" géifen all déi konventionéiert Betreiungsstrukturen am Land ugehale ginn, fir inklusiv ze schaffen.
Méi zum Thema
Méi Aarbechtsplaze fir behënnert Persounen
D'Ateliers protégés vun der APEMH zu Lampech gi vergréissert: déi zweet Phas vum Chantier fänkt Enn 2017 un. Donieft annoncéiert d'APEMH-Direktesch Liette Braquet eng inklusiv Maison Relais zu Beetebuerg.
Méi Rechter fir Persoune mat Behënnerung
D'UN-Konventioun fir d’Rechter vu Persoune mat Behënnerung muss zu Lëtzebuerg nach ëmgesat ginn. Eng besser Integratioun a manner Diskriminéierung fuerderen an deem Kader d'Behënnerten-Organisatiounen.
