Ënnert de Presidente vun de Chamberfraktiounen ass nom Opdecke vun der Sécherheetslück d'Iwwerraschung an och d'Suerg grouss. "Mir hunn am Fong déi beschten Alarmanlagen, mä mir hunn d'viischt Dier opgelooss", sou resuméiert den DP-Fraktiounspresident Eugène Berger de Virfall.
Wéi seng Kollegen wëllt och hien déi technesch a juristesch Analys ofwaarden, schwätzt awer och méiglech Suitten un. Wann eng Faute grave géif virleien, missten déi néideg Prozeduren an d'Weeër geleet ginn.
Den CSV-Fraktiounspresident Claude Wiseler seet, hie wier besuergt, well een dovu misst kënnen ausgoen, datt Sécherheetssystemer fonctionnéieren. D'Dokumenter, déi de Geheimdéngscht betreffen, wieren net klassifizéiert a souwisou fir d'Deputéiert accessibel gewiescht.
"Net all Wuert op d'Goldwo"
Wéi eng a wéi vill Dokumenter duerch d'Sécherheetslück accessibel waren, schéngt de Chamberfraktiounen nach net kloer ze sinn. "Ech weess och net, ob dat kann novollzu ginn", seet de Gast Gibéryen vun der ADR.
Am Communiqué, deen d'Chamber e Mëttwoch den Owend un d'Press geschéckt huet, geet Rieds vun enger Intrusioun. Deemno hätten also eng oder méi Persounen sech ob eng inopportun Manéier Zougang op de Site verschaaft. "Ech géif net all Wuert an deem Communiqué op d'Goldwo leeën", seet den Alex Bodry vun der LSAP. D'Bureausmembere wéilte virun allem elo wëssen "wat genee geschitt ass."
Niewent dem Accès op de Site vun der Chamber vu baussen, mellen och verschidden Deputéiert Problemer, fir op bestëmmten Dokumenter zouzegräifen. Den David Wagener vun déi Lénk seet, datt hien de Moment keen Accès op seng E-Mailen an aner Dokumenter hätt.
Christiane Kleer, den 8. Mäerz 2018 am Panorama um 12:00
D'Chamber hat e Mëttwoch den Owend matgedeelt, si hätte Korrekturmesuren en Place gesat. Kuerz duerno ass de ganze Site awer fir Maintenance-Aarbechte vum Netz geholl ginn. Wéi mir gemellt hunn, waren eng ganz Partie intern a vertraulech Dokumenter net richteg securiséiert. Se ware vu baussen iwwer en normale Webbrowser accessibel. E Freideg de Mëtteg soll eisen Informatiounen no eng Personalreunioun fir d'Chambermataarbechter sinn. Den Ament géifen extern Firmaen hëllefen, den Internetsite nees ze securiséieren.
