Humanitär Hëllef Caritas: "D'Keelt ass de gréisste Problem fir vill Ukrainer"

Dem Joe Biden säi Besuch gëschter zu Kiew wier ganz gutt bei der lokaler Populatioun ukomm. Dat seet de Michael Feit vu Caritas Lëtzebuerg, den am Moment an der ukrainescher Haaptstad ass.

Visitt vum Biden huet Sécherheetsgefill ginn

Vill Kiewer géifen d'Visitt vum US-President als Zeeche gesinn, datt d'Ukrain net géif vu senge Partner vergiess ginn. Dat géif och d'Sécherheetsgefill op der Plaz stäerken, esou de Michael Feit.

"Selbst der Luftalarm, der ja während Bidens Besuch kam, wurde eigentlich quasi völlig ignoréiert. Kaum einer ist in die Metro gegangen, kaum einer ist in die Schutzräume gegangen. Weil jeder sagte: Wir sind in Sicherheit, das wird nicht passieren, weil Biden ist da."

D'Populatioun wier och frou iwwer déi zousätzlech militäresch Ënnerstëtzung, déi den Joe Biden ugekënnegt huet. Och wann d'Leit vill eegent Leed missten erdroen, sou wier d'Solidaritéit mat der Arméi grouss, seet de Caritas-Vertrieder.

Fënnef Millioune Flüchtlingen déi nach am Land sinn

D'Keelt ass am Moment de gréisste Problem fir vill Leit an der Ukrain. Dee Constat huet de Michael Feit gemaach. Hien ass am Moment am Gaangen sech an der Géigend ëm Kiew e Bild dovun ze maachen, wéi am beschte kann op der Plaz gehollef ginn.

Op Hëllef ugewise wieren dobäi virun allem déi Ukrainer, déi kee festen Dag iwwer dem Kapp hunn.

"Wir reden ja hier von fünf Millionen Flüchtlingen, die noch im Land sind. Also fünf Millionen Menschen, die nicht zu Hause wohnen, die in teilweisen prekären oder katastrophalen Situationen leben, die gerade jetzt im Winter frieren, und sich dann mit dem Nötigsten über Wasser halten."

Et krit een ëmmer iergendwéi eppes fir ze iessen, mengt de Michael Feit. Mee et géing u Wiermt feelen, fir déi kal Temperature gutt erdroen ze kënnen.