Als Beispill huet de Philippe Wilmes d'Schmerztherapie genannt, déi laang net vun der Gesondheetskeess couvréiert gouf. Sou hätt et méi ewéi zéng Joer gedauert fir een Tariff ze fanne fir déi chronesch Schmerzpatienten.
"Dat si Leit, déi all Dag ënnert staarkem Schmäerz leiden. Déi hu missen an d'Ausland goen, an hunn onméiglech Périplen op sech geholl fir zu hire Behandlung ze kommen, well mir et hei zu Lëtzebuerg net fäerdeg bruecht hunn do en Tarif op d'Been ze stellen, den et erméiglecht hätt, déi Leit adequat en Charge ze huelen."
Fir datt esou Traitementer an Zukunft direkt kennen ugebuede ginn, misst een neie Finanzéierungs-Mechanismus bei der CNS geschaafe ginn, esou d'Fuerderung vum Vizepresident vun der AMMD.
Keng politesch Ambitiounen
Iwwerdeems huet de Vizepresident vun der Doktesch-Associatioun AMMD nach annoncéiert, datt hien net mat an d'Chamberwale wäert goen. De Philippe Wilmes geet op enger DP-noer Lescht mat an d'Gemengewalen, an hien huet och confirméiert, datt hie Member vun der liberaler Partei ass. Hien géif awer keng Karriär an der nationaler Politik ustriewen, esou de Philippe Wilmes de Moien hei op der Antenn.
"Ech hu keng nationalpolitesch Ambitiounen. Ech wäert net mat an d'Chamberwale goen, dat kann ech Iech haut hei op der Antenn soen. Ech hunn aner Projeten am Liewen, déi ech an de nächste Joren nach wëll poursuivéieren. An ech mengen et geet duer, wann een an der Famill op dem Niveau ënnerwee ass."
Den AMMD-Vizepresident ass dem Serge Wilmes säi Brudder, den an der Stad Lëtzebuerg als Spëtzekandidat vun der CSV an d'Gemengewale geet.