Hie kéint eng Quota-Léisung virstellen, sou de Lëtzebuerger Ausseminister. "Quotaen, wou ee seet: Esou vill Leit huele mer aus Afghanistan, an all Land huet der esou vill opzehuelen. Dat schéngt mir eppes ze sinn, dat mer och scho mat anere Länner hätte maache kënnen. Mee do ass keng Spuer datt mer eis dorop eens ginn."
Nieft der Fro, wéi ee mat de Flüchtlingen ëmgeet, wier et awer och ganz wichteg, datt d'EU probéiert hir humanitär Hëllef am Afghanistan oprecht ze erhalen, esou de Jean Asselborn. D'Hallschent vun der afghanescher Populatioun wier nämlech op humanitär Ënnerstëtzung ugewisen, betount de Lëtzebuerger Ausseminister.
Lëtzebuerger Arméi schafft u Rapatriement vu sechs Persounen
Véier Lëtzebuerger Staatsbierger an zwou Persounen, déi hei am Land wunnen, sinn am Moment nach am Afghanistan. An et ass nach net kloer, wéini si kënnen zeréck op Lëtzebuerg bruecht ginn. Den Ausseminister Jean Asselborn seet, d'Lëtzebuerger Arméi géif dee Rapatriement am Moment zesummen mam belsche Militär organiséieren. Wéi déi Aktioun genee ofleeft misst an den nächsten Deeg gekuckt ginn. Donieft sollen awer och afghanesch Staatsbierger zu Lëtzebuerg opgeholl ginn, déi fir d'EU an d'NATO geschafft hunn, esou de Jean Asselborn. Vun den éischte Lëschte géif Lëtzebuerg elo mol 12 Mënschen ophuelen.