Visite vum Xavier Bettel a Kanada Kanada: Partner bei GovSat?

Kanada gesäit Lëtzebuerg als séchere Partner, zum Beispill fir Finanzservicer. Bei där rezenter Visite vum Premier a vum Finanzminister a Kanada goufen déi politesch, ekonomesch a kulturell Relatiounen tëscht béide Länner verstäerkt. Et gouf ee Vertrag ënnerschriwwen, fir kanadesch-lëtzebuergesch Filmproduktiounen. Kanada gëtt och als Partner envisagéiert, fir de Projet vum Lëtzebuerger Militär-Satellit GovSat.

Yascha Wecker / pre

Xavier Bettel a Justin Trudeau
Xavier Bettel a Justin Trudeau (Photo vum CPM vum Adam Scotti)

“Kanada ass ee G7-Member an ee wichtegen Handelspartner fir Lëtzebuerg”, seet de Xavier Bettel. Am Joer 2015 war Lëtzebuerg mat 43 Milliounen Euro deen drëttgréissten direkten auslänneschen Investisseur a Kanada.

Als Premier war et dem Xavier Bettel seng éischt Begéinung mat sengem kanadeschen Homolog Justin Trudeau. “Mir deelen déiselwecht Wäerter”, sot de Xavier Bettel no sengem Gespréich mam Justin Trudeau zu Ottawa.

Partner bei GovSat?

Bei den Diskussioune wier kloer ginn: Kanada wéilt a ville Beräicher mat Lëtzebuerg zesummeschaffen, esou de Xavier Bettel. An deem Kontext wier och iwwert de Lëtzebuerger Militär-Satellit GovSat geschwat ginn.

“Ech brauch et net ze verstoppen, ob déi kanadesch Regierung do intresséiert ass, fir Partner ze ginn”, sot de Premier am 100,7-Interview. Weider Detailer gouf hien net.

Lëtzebuerg: “Zouverlässege” Partner

“An engem globale Klima vun Onsécherheet ass et fir Kanada wichteg, zouverlässeg Partner ewéi Lëtzebuerg ze hunn”, esou de Lëtzebuerger Premier. De Brexit an d’Presidentschaftswahlen a Frankräich wiere zwee Beispiller vun der aktueller Onsécherheet.

D'Reputatioun vu Lëtzebuerg, als politesch stabelt Land, wier besonnesch bei de Finanzservicer ee grousse Virdeel. D’Kooperatioun tëscht Kanada a Lëtzebuerg am Beräich Finanzservicer géif deemno verstäerkt ginn, sot nach de Xavier Bettel. Dat gouf och bei enger Entrevue tëscht dem Finanzminister Pierre Gramegna a sengem kanadeschen Homolog Bill Morneau ënnerstrach.

CETA: “Virdeel” fir d’Lëtzebuerger Konsumenten

D'CETA Fräihandelsofkommes tëscht Kanada an der EU wier e gudden Akkord, sot de Xavier Bettel zu Ottawa. Natierlech misst sécher gestallt ginn, dass sozial an Ëmwelt-Standarden net ofgebaut ginn. Dat wier an deem Akkord awer garantéiert.

Fir Lëtzebuerg géif CETA nei Méiglechkeete bidden, fir d'Handelsbezéiungen ze verstäerken. Fir d'Konsumente wier et och e Virdeel, wann zum Beispill op verschiddene kanadesche Produiten, déi Lëtzebuerg importéiert, kéng Taxe musse bezuelt ginn, esou de Xavier Bettel.

Audiovisuell Koproduktiounen

Den Direkter vum Lëtzebuerger Filmfong, de Guy Daleiden, an de kanadeschen Ambassadeur fir d’Belsch an de Grand-Duché, den Olivier Nicoloff, hunn een neie Vertrag ënnerschriwwen deen d’Entwécklung vu Koproduktiounen am Beräich Film, Televisioun a Video soll ënnerstëtzen. Produzente kennen domatter vu Subventiounen a Steiervirdeeler a béide Länner profitéieren.

Reportage vum Yascha Wecker a Kanada

Dee ganzen Interview mam Xavier Bettel a Kanada

Méi zum Thema

"Super Charger"-Borne
Mobilitét

A Kanada geet et a Saachen Elektromobilitéit éischter lues virun. Dobäi hätt de Staat vill Potential, mengen Experten. Wéi eng Moossname ginn et schonn? A wéi eng misst een encouragéieren?

Kanadesch regierung.jpeg
Fräihandel

Gëtt de CETA-Accord Realitéit? Doriwwer entscheeden den 18. Oktober d'EU-Handelsministeren . Mee nach ass onkloer, ob ee Konsens tëscht de Memberstaaten kann entstoen. Wéi denkt Kanada iwwert den Accord?

Programm

Dossieren

  • CinÉast 2017

    Schonn déi zéngten Editioun vum Lëtzebuerger Filmfestival, deen e breede Panorama vum "Art et essai"-Kino aus Mëttel- an Osteuropa bitt. Eng 100 Projektioune vu Wierker aus 19 europäesche Länner.

  • Gemengewahlen 2017

    Den 8. Oktober kënnen d'Bierger aus de 105 Gemengen am Land hir lokal Vertrieder nei bestëmmen.

Communiquéen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen