Matbestëmmung ass e Kannerrecht Kanner kréien d'Wuert

Matbestëmmung ass eent vun de Kannerrechter, dat haut am Mëttelpunkt steet um Internationalen Dag vun deene Kannerrechter. De Weekend hu Kanner matgeschwat, op enger éischter Kannerkonferenz hei am Land. Dës gouf organiséiert vum Kannerbüro Wolz an dem Zentrum fir politesch Bildung. Ronn 100 Leit - Kanner, Elteren an Educateuren - hunn zesummen iwwer Kannerrechter diskutéiert. Am Virfeld vum Internationalen Dag vun de Kannerrechter haut, war d'Rahel Könen dobäi.

Rahel Könen / cbi

Kannerrechter
Op der Kannerkonferenz gouf de Kanner nogelauschtert

Ronn 80 Kanner tëschent aacht a zwielef Joer hunn op der Kannerkonferenz CHICO hir Meenung geäussert an interaktiv iwwer Kannerrechter diskutéiert. Si konnte selwer Themen uschwätzen, déi fir si wichteg sinn, wéi zum Beispill Gewalt géint Kanner, Ëmweltverschmotzung, den Auto oder Plastik.

Kanner zu Wuert komme loossen

Vun Ëmweltproblemer bis hin zu Gewalt Doheem - d'Themen déi d'Kanner sech selwer erausgesicht hunn, ware vilfälteg a goufe vun hinnen am klenge Krees virgestallt an diskutéiert. An enger Diskussiounsronn iwwer Mobbing erklären zwee jonk Meedercher, datt hir Schoul e Kannercomité gegrënnt hätt fir dëse Problem unzegoen. Hei kéinte si iwwer Problemer an aner Themen, wéi net fëmmen, Ëmwelt a Mobbing schwätzen. "D'Kanner am Kannercomité sinn ëmmer do, fir wann een zum Beispill gemobbt gëtt, da komme si an hëllefen hinnen", zielt ee Kand.

Op der Kannerkonferenz konnten d'Kanner verschidden Themen diskutéieren

E puer Meter niewendrun huet en anere Grupp Gewalt thematiséiert. Véier Jonge soten, si wieren ufanks opgereegt gewiescht, hätten et awer flott fonnt, datt och Erwuessener hinnen am Grupp nogelauschtert hunn. Um Enn konnten d'Kanner wärend der Diskussiounsronn hir Iddien a Léisungsvirschléi festhalen: "Et muss ee mat Leit schwätzen, deenen ee vertraue kann. Net mat Friemen, well soss gëtt dat ganz ronderëm geschwat." Eng aner Approche wier et, fir mam Jugendtelefon ze schwätzen, deen et och zu Lëtzebuerg gëtt.

D'Meenung vun de Kanner ass wichteg

Op der éischter Kannerkonferenz wier et virun allem drëms gaangen de Kanner d'Wuert ze ginn an hinnen ze weisen, datt si an hir Meenung wichteg sinn. Dat erkläert d'Kim Nommesch vum Zentrum vir Politesch Bildung. Virun allem géif ee mierken, datt Gerechtegkeet de Kanner um Häerz läit:

"Si wësse ganz genee, wat heescht fair an net fair. An ech mengen, do geet och drëms, wann d'Kanner gesinn, datt eppes net fair ass, datt si d'Méiglechkeet hu fir sech do auszedrécken an och d'Méiglechkeet hu fir do kënnen eppes mat ze veränneren. Well ech menge Kanner si Bierger, sou wéi Erwuessener och, an dofir ass et wichteg fir hir Stëmm do eescht ze huelen an déi ze lauschteren."

Och d'Kanner fannen et wichteg, datt op hir Meenung gelauschtert gëtt a wënsche sech, datt all Kand weltwäit duerch Rechter geschützt gëtt.

An der Mediathéik:

Aktuelles / / radio 100,7
Lauschteren

Méi zum Thema

René Schlechter
ORK

Den Ombudscomité fir d'Rechter vum Kand behandelt a sengem Rapport besonnesch d'Situatioun vu Kanner vu Frontalieren, vun Expats a vu Flüchtlingen. An d'Rechter vu mannerjärege Refugiéen ouni Begleedung.

Laurence Bouquet, Dr Roland Seligmann, Pierrette Meisch
Riicht eraus

Kanner, déi Zeie vun haislecher Gewalt sinn, ginn net als Affer unerkannt. Dat muss sech änneren, fuerderen Associatiounen. Gewalt doheem géif méi wäit goen, wéi dat wat an offizielle Rapporte beliicht gëtt.

Net verpassen

  • 18.1. E-lodie Sessions live am Studio 8 - Dankwart

    Dankwart

    Bei senger E-Lodie Session den Owend viru Publikum proposéiert de Sam Erpelding eng Interpretatioun vun "Domhan Cùis", eng Evolutioun vun der Aarbecht um Album. Et gëtt danzbar a bësse schamanistesch.

Dossieren

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun hire Bierger? Mir weise konkret Beispiller.

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen