Chamberwahlen 2018 "Kee Verstouss géint d'Verfassung"

De Robert Mehlen (ADR) fuerdert d'Chamber op, d'Wahlresultater net ze validéieren, well de Wahlsystem verfassungswiddereg wier. Déi Intentioun hätt keng Aussiicht op Erfolleg, mengt de Luc Heuschling.

Maurice Molitor / fk

Luc Heuschling
Luc Heuschling

De Robert Mehlen, deen de leschte Sonndeg bei de Chamberwahlen fir d'ADR kandidéiert huet, empfënnt et net just als Ongerechtegkeet, mee souguer als anti-konstitutionell, datt am Bezierk Osten, wou hie Kandidat war, nëmme siwe Mandater ze verdeele sinn. An engem Bréif, d'lescht Woch un de Chamber-President, hat hien ausgerechent, datt am Bezierk Zentrum just duebel souvill Wieler wunnen, wéi am Osten. Mee, datt déi awer dräi mol méi Deputéierter bestëmmen. Dat wär e Verstouss géint den Artikel 10bis vun der Verfassung, dee seet "Tous les Luxembourgeois sont égaux devant la loi".

"kee Verstouss géint d'Verfassung"

Hie géif mat senger Aschätzung richteg leien, wann een d'Zuel vun de Wieler als Basis géif huelen. Dat seet de Verfassungsexpert a Professer op der Uni Lëtzebuerg, Luc Heuschling. Wann ee sech awer op d'Bevëlkerungszuel berifft- also Wieler, Net-Wieler an auslännesch Residenten, wat a ville Wahlsystemer och esou geschitt - da wier d'Problematik senger Meenung no just ganz kleng an och kee Verstouss géint d'Verfassung, esou nach de Luc Heuschling. Well där Rechnung no hätt den Zentrum en halleft Mandat ze vill, an de Süden en halleft Mandat net genuch. Den Osten an den Norde wiere korrekt representéiert.

De Robert Mehlen fuerdert, datt d'Chamber d'Wahlresultater net validéiert. Hie behält sech allméiglech rechtlech Schrëtt vir a wëll noutfalls bis op den europäesche Menscherechts-Geriichtshaff zu Stroossbuerg goen. Ma sou guer wann d'Wahlgesetz verfassungswiddereg wier, da kéint déi zoustänneg Chamberkommissioun - wa si dann de Courage hätt - dat soen, mee juristesch gesi misst si d'Gesetz applizéieren, seet de Luc Heuschling.

"Well déi éischt Instanz, déi zu Lëtzebuerg ka soen, datt e Gesetz verfassungswiddereg ass an, datt et dofir net méi applizéiert gëtt, ass d'cour constitutionelle. Mee well eis Politiker 1997 eng ganz minimalistesch Opfaassung vum Rôle vun dësem Geriicht verankert hunn, ass et ganz schwéier d'Verfassungsgeriicht unzeruffen."

Nëmmen normal Geriichter kéinten déi Demarche maachen, esou nach de Verfassungsexpert. Déi zoustänneg Chamberkommissioun ass awer kee Geriicht a kéint d'cour constitutionelle dofir net uruffen. "Dat heescht, et ka keen offiziell deklaréieren an dësem Fall, datt d'Gesetz verfassungswiddereg wier. An domat muss d'parlamentaresch Kommissioun d'Gesetz applizéieren."

Interview mam Luc Heuschling

Méi zum Thema

2018-10-04-Fàf-Colombera-Mehlen
Chamberwahlen 2018

De Jean Colombera (PiD) an de Robert Mehlen (ADR) si sech eens: De Lëtzebuerger Wahlsystem wier ongerecht, well e méi kleng Parteie géif benodeelegen. D'Stëmmen aus de verschiddene Bezierker wieren ënnerschiddlech vill Wäert.

Net verpassen

  • Rapport d'activités 2021

    Banner.jpg

    De Rapport d'activités 2021 vum radio 100,7 ass verëffentlecht ginn. E gëtt en Abléck an d'Aktivitéite vun de verschiddene Servicer a Redaktiounen am leschte Joer.

Programm

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen