Chamberwahlen 2018 Klimaschutz: Op der Trajectoire

Lëtzebuerg respektéiert viraussiichtlech d'Klimaschutzziler fir 2020. Strukturell Reformen a Richtung Klimaneutralitéit feelen um Enn vun dëser Legislatur awer nach, mengt d'Pia Oppel an enger Analys.

Pia Oppel / cbi

Analys Pia Oppel
"Strukturell Ännerunge si bis elo keng decidéiert ginn", seet d'Pia Oppel.

"De Klimaschutz huet am Regierungsprogramm eng reell Wichtegkeet", sot déi gréng Fraktiounscheffin Viviane Loschetter am Dezember 2013 an der Chamberdebatt iwwer de Regierungsprogramm.

Effektiv si vill Mesuren annoncéiert an ëmgesat ginn: Et gëtt elo de Klimabank-System, dee gënschteg Kreditter fir d'energetesch Sanéierunge vu Gebaier erméiglecht. Ee Gesetz iwwer d'Energieeffizienz gouf gestëmmt, d'Investitiounen an de Schinneverkéier si geklomm an Energiekooperative gi gefërdert.

"De Staat wäert op 100 Prozent grénge Stroum ëmswitchen", sot d'Viviane Loschetter am Dezember 2013. Och dat ass geschitt, heescht et op Nofro hin am Nohaltegkeetsministère.

Strukturell Ëmstellunge fir de Klimaaccord vu Paräis

D'Lëtzebuerger EU-Presidence huet, wéi am Regierungsprogramm annoncéiert, am Dezember 2015 eng wichteg Roll gespillt an de Verhandlunge fir den internationale Klimaaccord vu Paräis. D'Ofkommes gesäit vir, datt d'Äerderwiermung op däitlech ënner zwee Grad limitéiert soll ginn. Fir dat Zil ze erreechen, misst d'Weltwirtschaft bis d'Mëtt vum Joerhonnert quasi klimaneutral funktionéieren.

Datt dofir eng strukturell Ëmstellung néideg ass, notamment an de Beräicher Transport an Energie, war der blo-rout-grénger Koalitioun och 2013 scho bewosst. Am Regierungsprogramm heescht et: "Le Gouvernement est dès lors décidé d'ériger la transition énergétique au rang de priorité politique."

Strukturell Ännerunge sinn awer weider keng decidéiert ginn: Zwee Drëttel vun de Lëtzebuerger CO2-Emissioune ginn op de Konto vum Stroosseverkéier, besonnesch vun Net-Residenten.

Kee Progrès beim Tanktourismus

Eng Etüd iwwer den Tanktourismus, deen 2012 iwwer zwou Milliarden Euro an d'Staatskeese gespullt huet, ass, wéi am Koalitiounsaccord versprach, realiséiert ginn. Mee dat war et och. 2017 ass de Verkaf vu Bensin an Diesel anescht wéi d'Jore virdrun nees geklommen.

Datt sou vill Bensin an Diesel verkaf gëtt, an do Agro-Kraaftstroffer bäigemëscht ginn, erlaabt et Lëtzebuerg op der anerer Säit d'EU-Virgab vun 11 Prozent erneierbar Energien ze erreechen.

Erneierbar Energien: Nach wäit ewech vum Zil

"Le Gouvernement entend faire du Luxembourg un pionnier en ce qui concerne l'efficacité énergétique et les énergies renouvelables dans la Grande Région," huet et am Koaltiounsaccord geheescht.

Mat fënnef Prozent selwer produzéierter erneierbarer Energie par rapport zum Gesamtenergieverbrauch ass de Grand-Duché um Enn vun dëser Legislatur nach wäit vun deem Zil fort ... an op der leschter Plaz am europäesche Verglach.

Vun der Steierreform, déi 2017 a Kraaft getrueden ass, ass kee groussen Impuls fir de Klimaschutz ze erwaarden. Zur Fro wou hir Partei sech méi hätte missen duerchsetzen, sot déi gréng Fraktiounscheffin Viviane Loschetter an engem Wort-Interview am August: "Bei der Steierreform - do muss ech ee grousse Mea Culpa maachen, well ech Member an deem Gremium war. Dat war net eis Prioritéit an dat war ee Feeler."

An der Mediathéik:

Chamberwahlen 2018 / / Pia Oppel
Lauschteren

Méi zum Thema

Pia Oppel Analys
Chamberwahlen 2018

Zu Lëtzebuerg gouf et 2013 e schwaache Wirtschaftswuesstem an eng héich Inflatioun. Den ekonomesche Kontext huet awer séier changéiert. D'Regierung konnt sech dowéinst wirtschaftspolitesch op d'Unzéie vun neie Betriber an Aktivitéite konzentréieren.

Regierung Analys
Chamberwahlen 2018

D'Regierung huet 2013 eng nei Kultur vun der Oppenheet annoncéiert, e "Renouveau Democratique". Eng nei Verfassung, méi politesch Participatioun an Transparenz goufe versprach. E Bilan vum Pia Oppel.

Programm

Dossieren

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

  • Literaturfestival "étonnants voyageurs"

    Iwwer de Päischtweekend stoung d'Literatur aus der ganzer Welt, awer och de Film an d'Ausstellungen am Mëttelpunkt an der klenger bretonescher Festungsstiedche Saint Malo.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen