De Henry Knuppertz wier vu ville Leit, souwuel vum Personal wéi och vun de Bewunner selwer iwwer Mëssstänn déi lescht zwee Joer an der Fondatioun Kräizbierg opmierksam gemaach ginn.
"Ech muss soen, dat wat mir do zu Oure komm ass, ass wierklech immens grav. D'Problematik ass, datt déi Behënnert am Fong ugesi gi wéi normal Schaffender, ech géif souguer nach méi weit goen a behaapten datt se exploitéiert ginn. An dat ass onmënschlech."
"Déi ganz Struktur ass net méi up to date"
Tëschent der Personaldelegatioun an dem Direktiounscomité vun der Diddelenger Fondatioun Kräizbierg gëtt et zanter Méint eng Vertrauenskris. Den Henry Knuppertz géif och verstoen datt d'Personal d'Léisungsvirschléi vum Verwaltungsrot fir op de Wee vun engem externen Audit ze goen, net géif acceptéieren. Vun der Reunioun den Donneschdeg den Owend erwaart sech de President vun der APIA.
"Datt d'Leit wierklech nach méi konzentréiert op déi Saache fixéieren déi méiglech sinn, well dat do gëtt keng einfach Saach. Dee Conseil ass Joerzéngten al. Déi ganz Struktur ass net méi up to date an da kréie mir net an dräi Deeg geännert."
D'Elterevertriedung vertrëtt eegenen Aussoen no eng 100 Behënnert Leit um Kräizbierg a ronn 40 Elterendeeler.
