Politik Kritesche Moment fir d'EU

D'Europäesch Unioun huet et virum Weekend net fäerdeg bruecht fundamental Ännerungen un der Asylpolitik ze decidéieren. Et gouf rhetoresch opgerüst: an der Saach awer goufe just verschidde vag Piste festgehalen, mee keng konkret Mesuren. Den EU-Sommet huet eppes ganz kloer gewisen: wéinst dem Drock vun de Rietspopulisten ass d'Europäesch Unioun op engem kritesche Punkt ukomm. Et geet net méi ëm d'Asypolitik, mee ëm d'Zukunft an den Zesummenhalt an der EU, mengt de Jean-Claude Franck an der Europachronik.

Jean-Claude Franck / cz

Analys Jean-Claude Franck
Jean-Claude Franck

Vill Staats- a Regierungscheffe wollten nom Sommet net vill soen. Si ware frou, datt si dee penibele Verhandlungsmarathon vun den Donneschdeg op de Freideg hanner sech haten. Italien, Éisträich an d'Visegrad-Staaten Ungarn, Polen, Tschechien a Slowakei ware frou, datt si vill blockéiert kruten. Déi aner ware frou, datt iwwerhaapt en Accord iwwer d'Migratioun zustane koum.

Dat hat allerdéngs en héije Präis. Konkret Engagementer sinn no an no aus de villen Textversioune gestrach ginn. D'Éisträicher, mat hirer siwe Méint aler rietspopulistescher Regierung, hu verhënnert, datt Wien déi nächst sechs Méint während der EU-Presidence muss eng Reform vum Asylsystem op den Dësch leeën. D'Dublin-Prozedur, déi d'Zoustännegkeet vun de Staaten an der Prozedur vun den Asyldemandeure kläert, an déi allgemeng als gescheitert gëllt, wäert wuel soubal net méi op de Leescht geholl ginn. Haaptsächlech well ëmmer méi Memberlänner oppe soen, datt si keng Responsabilitéit fir anerer wëllen iwwerhuelen, Solidaritéit ass just nach interessant, wann et am eegenen Interessi ass; zanter dësem Sommet hu mir dat schwaarz op wäiss. Obligatoresch Quote fir d'Opdeelung vu Flüchtlinge kann d'EU sech an Tëschenzäit un den Nol hänken.

Diskussiounen op niddregem Niveau ukomm

D'Diskussiounen iwwer d'Asylpolitik a virun allem d'Inzenéierung an der Ëffentlechkeet sinn op esou engem nidderegen Niveau ukomm, datt ee sech schuddert. Éisträich an aner Länner maache wéi wann um EU-Sommet endlech eppes fir de sougenannte Schutz vun den EU-Baussegrenze gemaach gi wier: Dat weist, wéi ee Message hinne wichteg ass - egal wéi d'Realitéiten um Terrain ausgesinn.

A wann déi ee Mount al rietspopulistesch Regierung an Italien esou mécht, wéi wa si déi éischt wier, déi de Bréisseler Karussell un d'Wackele bruecht hätt, da sinn dat och just geziilte Messagen un déi eege Wielerschaft déi gleewe soll, hir Regierung hätt endlech eppes "géint de System" ënnerholl.
Dobäi ass dat iwwerhaapt net de Fall. Amplaz mat Argumenter a Virschléi op Bréissel ze kommen, hu si hanner zouenen Diere Stonne laang blockéiert a verhandelt, bis just nach eng verwässert an inkohärent europäesch Äntwert um Dësch louch. Dono si se virun d'Press gaangen an hu behaapt, si hätten elo fundamental Ännerunge bewierkt.

Och Xavier Bettel ännert seng Rhetorik

Eelef Méint virun den Europawahlen hunn déi etabléiert Parteie keng Äntwert op d'Entwécklung vun deene rietspopulisteschen Tendenzen. Den Ament maache si hiert Spill mat. Wéi d'Angela Merkel den Donneschdeg virun der Press sot, d'Prioritéit um Sommet wier de Schutz vun den EU-Baussegrenzen, war séier kloer, wou et géif hi goen. Op eemol wëllt kee méi d'Wuert Solidaritéit an de Mond huelen, sech zu iergend eppes engagéieren, wat vum "Vollek" kéint schlecht opgeholl ginn, an op eemol seet och e Lëtzebuerger Premier, hie wéilt hei keng Wirtschaftsflüchtlingen an et kéint een elo net all Schëff retten, wat an engem Hafen uklappt, well dat kéint bei de Flüchtlinge falsch Hoffnungen opkomme loossen. Obwuel d'Statistike weisen, datt d'Flüchtlingsbeweegungen a Richtung Europa par Rapport zu 2015 staark ofgeholl hunn an de Premier selwer seet, et géif den Ament éischter eng politesch, wéi eng humanitär Krise ginn.

"Mir brauchen eng offensiv Konfrontatioun"

Déi aktuell Eskalatioun vun der Debatt steet a kengem Verhältnis zur Entwécklung vun de Migratiounsfluxen. Et leeft also eppes falsch: D'Migratiounspolitik ass zu engem Spillball vu Populismus a Muechtpolitik ginn.

Wéi sot de Politikwëssenschaftler Jan-Werner Müller hei op der Antenn: Wann ee Populiste bekämpfe wëllt, muss een argumentéieren amplaz hinnen d'Feld ze iwwerloossen. D'EU huet dat net verstanen. An dowéinst hat een op dësem Juni-Sommet d'Impressioun, datt d'Europäesch Unioun - esou wéi d'Debatt elo leeft - net méi wäit kënnt. D'EU ass op engem kritesche Punkt ukomm. Wat mir brauchen, ass endlech eng offensiv Konfrontatioun.

An der Mediathéik:

Chronik / / Jean-Claude Franck
Lauschteren

Méi zum Thema

Och fir d'Kanner ass e Liewen an der Stad selwer besser wéi am Flüchtlingslager.JPG
Logement fir Flüchtlingen

Während d'EU méi eng streng Flüchtlingspolitik a Siicht stellt, hänken a Griichenland iwwer 50.000 Mënsche fest. 3.000 vun hinne wunne mëttlerweil a Squatten. ONGe sichen Alternativen zu Flüchtlingslageren.

Charles Goerens
Flüchtlingsdebatt

De Charel Goerens (DP) schummt sech fir de Chaos an der EU-Asylpolitik. D'Léisung wier eng fair Verdeelung vu Flüchtlingen. Rietspopuliste géifen ee Problem kënschtlech schafen, fir doraus Profit ze schloen.

Ernest Walerius.JPG
Gemengewalen

D'Auslänner- an Integratiounskommissioun vu senger Gemeng géif net genuch fir Flüchtlinge maachen, seet de Buergermeeschter vu Bäerdref. Eng 150 Flüchtlinge sinn an der Weilerbaach ënnerbruecht.

Jean Asselborn
Flüchtlingspolitik

Den LSAP-Ausseminister Jean Asselborn distanzéiert sech vu sengem Parteikolleg Nicolas Schmit. Den Aarbechtsminister sot am Wort-Interview, datt Asyldemandë baussent der EU missten traitéiert ginn.

Michel Delage Kommentar
Flüchtlingskris

Mam Accord, deen d'EU-Memberstaten de leschte Freideg mat der Tierkei ofgeschloss hunn, soll déi illegal Migratioun gestoppt ginn. Faktesch gëtt d'Recht op Asyl allgemeng ënnergruewen.

Programm

Dossieren

  • Mënscherechter

    Den 10. Dezember 1948 sinn zu Paräis déi universell Mënscherechter deklaréiert ginn. Um 70. Joresdag vun dëser Deklaratioun steet de Programm vum radio 100,7 ganz am Zeeche vun de Mënscherechter.

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

Communiquéen

  • Offre d'emploi: Directeur général (M/F)

    L'Etablissement de Radiodiffusion Socioculturelle, opérateur de la radio de service public radio 100,7, recherche un directeur général (m/f)

  • Communiqué du Conseil d’administration du 100,7

    Le Conseil a décidé de créer un comité de transition présidé par Mme Nancy Braun pour la période du 15/12/2018 jusqu'à l'entrée en fonction du nouveau Directeur (m/f). Mme Michèle Vallenthini est nommée suppléante.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen