Allgemeng gëtt fir 2022 e Réckgang vun den abezuelte Primmen ëm 5,1 Prozent op 40,2 Milliarden Euro notéiert. Des Baisse ass méi speziell op de Secteur vun de Liewensversécherungen zréck ze féieren. D'lescht Joer gouf et am Beräich Vie ee Minus vun iwwer 16 Prozent bei de Primmen, erkläert de Marc Hengen.
Onsécherheeten op de Finanzmäert
Et hätt domat ze dinn, datt d'Finanzmäert zimmlech onsécher domat gewiescht wieren. Déi vill Onsécherheete wieren haaptsächlech duerch de Krich deen ugaangen ass, déi grouss Inflatioun an déi relativ staark Augmentatioune vum Taux d'Interêt, komm.
Positiv entwéckelt huet sech dogéint de Beräich non-vie, also an der Haaptsaach Feier an Haftflichtversécherungen, hei gouf et ee plus vu 15 Prozent. Dee Plus ass allerdéngs zu ronn 93 Prozent op Clienten zréck ze féieren déi am Ausland liewen, wat weist wéi wichteg déi international Assurancenaktivitéite bleiwen.
Lëtzebuerg als Finanzplaz soll weiderhin attraktiv bleiwen
An dem Kontext wënscht sech den Assurancësecteur och dat Lëtzebuerg als Finanzplaz weiderhin attraktiv bleift. Hien ënnersträicht, datt et dowéinst wichteg wier ëmmer um Ball ze bleiwen a verschiddenen neien Tendenzen, haaptsächlech am Ausland, och kënne Rechnung droen.
Zu der Wonschlëscht un d'Parteie virun de Wale gehéiert engersäits eng méi liberal Reegelung vum Secret professionell. Dat géif d'Aktivitéiten op internationalem Plang vereinfachen. An engems sollte sous-traitances per Gesetz zougelooss ginn.
Formatioun vu qualifizéiertem Personal a manner Reglementatioun si weider Fuerderungen. Donieft wëll de Secteur och eng Moderniséierung vum Regime vun den Zousazpensiounen.
