Reformproposen LSAP wëllt sech d'Méiglechkeet vun enger Duebelspëtzt ginn

Den LSAP-Parteipresident huet ënnerstrach, datt et awer keng Flicht wier, fir eng Duebelspëtzt opzestellen. "Dat ass eng Kann-Bestëmmung, keng Muss-Bestëmmung."

Op dësem Parteikongress Mëtt November soll och doriwwer decidéiert ginn, ob d'Presidence vun der Partei och paritéitesch beluecht soll ginn: et sollen deemno souwuel ee Parteipresident, wéi och eng Parteipresidentin ginn.

Reform vun der Grondsteier

D'Präisspiral am Logement misst gebrach ginn an dofir géif Regierung am Moment un enger Neiberechnung vun der Grondsteier schaffen.

Dem LSAP-Präsident Yves Cruchten no géif et dobäi net drëms goen all Mënsch fiskal ze bestrofen, deen en Terrain huet:

"Et brauch keen ze fäerten, datt e vun haut op muer misst an d'Täsch gräifen, mee et ass ganz kloer, datt mat enger neier Grondsteier eis Méiglechkeete geschaaft gi fir herno kënne geziilt géint Baulandspekulanten, zum Beispill, kënne virzegoen, oder géint Retentioun um Terrain. Ech mengen, datt mer nach gutt Zäit hu bis 2023 eppes Konkretes op den Dësch ze leeën. Ech mengen och, datt dat net méi laang dauert, wéi Verschiddener mengen."

Direkt Indexéierung vum Kannergeld

D'Wäerter vun der LSAP mat Solidaritéit a Gerechtegkeet souwéi engem staarke Staat hätte sech besonnesch an der Pandemie bewisen, sou de Fraktiounspresident Georges Engel. Et géif ee sech och an Zukunft fir déi asetzen, déi am meeschten Ënnerstëtzung bräichten.

Dat géif souwuel fir d'Kannergeld gëllen, wou een eng direkt Indexéierung ënnerstëtzt, wéi och fir d'Energiepräisser, déi an der Lescht explodéiert wieren. Hie missten déi richteg Instrumenter agesat gi fir finanziell auszegläichen.