D'Konditioun vun negative Corona-Tester fir Fluchpassagéier, déi op Lëtzebuerg reesen, wier "eng ganz iwwerluechten Decisioun, déi d'Reesen nach erméiglecht", esou d'Reaktioun vum Luxair-Generaldirekter Gilles Feith.
Vun e Freideg u bis Enn Februar musse Persounen, déi mam Fliger a Lëtzebuerg wëllen areesen, een negative PCR oder Schnelltest virweise kënnen.
D'Luxair wéilt dofir suergen, datt op allen Destinatiounen Test-Méiglechkeete fir d'Clienten organiséiert ginn: si géifen informéiert ginn, a si géifen net am Stach gelooss ginn, versprécht de Generaldirekter. Op Madeira hätt d'Luxair zum Beispill for d'Fuesvakanz Laboe fonnt, déi Tester direkt an den Hoteller maachen.
D'Kontroll vun den Test-Resultater op den Destinatioune soll beim Anchecken op de Fluchhäfe gemaach ginn. "Mir wäerte keen op de Vol loossen, dee keen negativen Test huet", esou de Gilles Feith.
"Ech si perséinlech och ganz frou, datt déi Decisioun vun der Regierung och op Antigen-Tester setzt, Schnelltester: dat ass fir mech eng vun de Léisungen, nieft engem séieren Impfen."
Wéinst den neien Areesbestëmmungen, déi vun e Freideg u gëllen, hätten d'Luxair-Clienten de Moment vill Froen, confirméiert de Gilles Feith.
"De Client soll elo ofwaarden. Mir informéieren eis Clienten a mir kucken och eis Clienten net am Stach ze loossen."
Manner zefridden ass de Gilles Feith, datt déi nei Rees-Bestëmmunge vun der Regierung just d'Aviatioun treffen.