Radioen

On air

Owesconcert  |  20 Joer Mierscher Kulturhaus

play_arrow Live
arrow_back_ios

article

article

/ Lycéesreform: "Oppassen, datt d'Schoule sech net ze vill spezialiséieren"

Schoulrentrée

Lycéesreform: "Oppassen, datt d'Schoule sech net ze vill spezialiséieren"

Duerch d'Lycéesreform sollen déi eenzel Schoule méi Autonomie kréien. Den Direkter vum Lycée Aline Mayrisch warnt, dat dierft net dozou féieren, datt d'Lycéeë sech ze vill spezialiséieren.

auto_stories

2 min

D'Reform, déi virum Summer decidéiert gouf, gëtt vun e Méindeg un ëmgesat. Déi eenzel Lycéeën kréien doduerch, ënnert anerem, méi Spillraum fir nei Fächerkombinatiounen op deenen héije Klassen unzebidden. De Gaston Ternes ënnersträicht an dem Kontext, et misst ee "ganz gutt oppassen", datt d'ëffentlech-rechtlech Schoul och weiderhin d'Moyene kritt "fir allem gerecht ze ginn dat d'Gesellschaft hir ofverlaangt".

Net op "eenzel Domainer limitéieren"

Den neie System gesäit vir, datt all Schoul bis d'Rentrée 2018 en eegene Profil muss ausschaffen, e sougenannte Schoulentwécklungsplang. Dat dierft awer net heeschen, datt déi eenzel Lycéeë sech elo op "präzis Formatioune limitéieren", zum Beispill am Beräich vum "Entrepreneurship", sou den Direkter vum Lycée Aline Mayrisch. Wann ee sech mat zwielef Joer e Lycée eraussicht, wier et nämlech nach "ganz fréi" fir sech definitiv an eng bestëmmte Richtung z'orientéieren. D'Schoule missten dofir vill verschidde Kompetenzen ubidden.

De Lycée Aline Mayrisch géif och no der Reform "an der Progressioun" vun de leschte Joren virufueren, esou de Gaston Ternes. Seng Schoul hätt sech nämlech schonn e "Rahmenprogramm" ginn, wei se am Joer 2000 gegrënnt gouf. Elo géif et drëms goen "Enkpäss", déi et nach ginn, op de Leescht ze huelen. Am Classique géifen d'Schüler vun der Konschtsektioun, zum Beispill, vun elo un d'Optioun kréie méi Mathéscoursen ze beleeën wéi virdrun.

De Gaston Ternes ass zënter 17 Joer Direkter vum Lycée Aline Mayrisch um Geesseknäppchen. Am Februar 2018 geet hien a Pensioun.